രണ്ടു ദിവസമായി പെയ്യുന്ന മഴയില്‍ നടുങ്ങി വടക്കന്‍ കേരളം, നിരവധിപേരെ വീടുകളില്‍ നിന്നും ദുരിതാശ്വാസ ക്യാമ്പുകളിലേക്ക് മാറ്റി. വയനാട്, കോഴിക്കോട്,കണ്ണൂര്‍ ജില്ലകളില്‍ റെഡ് അലര്‍ട്ട് പ്രഖ്യാപിച്ചു. കണ്ണൂര്‍ – വയനാട് ജില്ലകളെ ബന്ധിപ്പിക്കുന്ന പാല്‍ചുരം റൂട്ടില്‍ ഗതാഗതം ഭാഗികമായി തടസ്സപ്പെട്ടു
കണ്ണൂര്‍,കാസര്‍കോട്, കോഴിക്കോട് തുടങ്ങിയ ജില്ലകളില്‍ കഴിഞ്ഞ രണ്ടുദിവസമായി കനത്ത മഴയാണ് തുടരുന്നത്.വയനാട് ,കണ്ണൂര്‍, കോഴിക്കോട് ജില്ലകളില്‍ റെഡ് അലര്‍ട്ടും കാസര്‍കോട് ,മലപ്പുറം ജില്ലകളില്‍ ഓറഞ്ച് അലര്‍ട്ടും പ്രഖ്യാപിച്ചു. കാസര്‍കോട്, കണ്ണൂര്‍ കോഴിക്കോട് ജില്ലകളിലെ വിദ്യാഭ്യാസ സ്ഥാപനങ്ങള്‍ക്കും അവധി പ്രഖ്യാപിച്ചിട്ടുണ്ട്. കനത്ത മഴയെ തുടര്‍ന്ന് കണ്ണൂര്‍ ജില്ലയില്‍ 90 പേരെ രണ്ടു ദുരിതാശ്വാസ ക്യാമ്പിലേക്ക് മാറ്റി. ഇരിട്ടി മണിക്കടവില്‍ ജീപ്പ് പുഴയിലേക്ക് മറിഞ്ഞ് ഒരാളെ കാണാതായി.
കുഞ്ഞിമംഗലത്ത് കുളത്തില്‍ വീണ യുവാവ് മരിച്ചു. കണ്ണൂര്‍ – വയനാട് ജില്ലയ്ക്കള ബന്ധിപ്പിക്കുന്ന പാല്‍ച്ചുരം റൂട്ടില്‍ മണ്ണിടിഞ്ഞതിനാല്‍ ഗതാഗതം ഭാഗികമായി തടസ്സപ്പെട്ടു. കാസര്‍കോട് ജില്ലയില്‍ രണ്ട് ദുരിതാശ്വാസ ക്യാമ്പുകളാണ് തുറന്നത്.പരപ്പ. കനകപ്പള്ളി വടക്കാംകുന്നില്‍ വീട് തകര്‍ന്ന് 5 പേര്‍ക്ക് പരിക്കേറ്റു.വടകര വില്യാപ്പള്ളിയില്‍ പത്ത് പേരെ അന്‍സാര്‍ കോളേജിലേ ദുരിതാശ്വാസ ക്യാമ്പിലേക്ക് മാറ്റി. കോഴിക്കോട് ജില്ലയിലെ ദുരിതാശ്വാസ പ്രവര്‍ത്തനങ്ങള്‍ക്കായി നാലു താലൂക്കുകളും കണ്‍ട്രോള്‍ റൂം പ്രവര്‍ത്തിക്കുന്നുണ്ട്. മലപ്പുറം ജില്ലയിലെ മലയോര മേഖലയിലാണ് കനത്ത മഴ ലഭിച്ചത്. ജില്ലയിലെ തീരദേശ മേഖലയില്‍ കടല്‍ കരയിലേക്ക് കയറി. ചലിയാറിലെ ജലനിരപ്പും ഉയര്‍ന്നു.
