കൊവിഡ് രോഗികളുടെ വിവരം ശേഖരിക്കാന്‍ നിയമിച്ച വിദേശ കമ്പനിയായ സ്പ്രിംക്ലറിനെ വിവരശേഖരണത്തില്‍ നിന്ന് ഒഴിവാക്കി. സര്‍ക്കാരാണ് ഇക്കാര്യം ഹൈക്കോടതിയില്‍ അറിയിച്ചത്. ഡാറ്റാ ശേഖരണവും വിശകലനവും ഇനി സര്‍ക്കാരിന് കീഴിലുള്ള സി-ഡിറ്റ് നടത്തുമെന്ന് ഹൈക്കോടതിയില്‍ സമര്‍പ്പിച്ച സത്യവാങ്മൂലത്തില്‍ സര്‍ക്കാര്‍ വ്യക്തമാക്കി.
സ്പ്രിംക്ലറിന്റെ കയ്യിലുള്ള ഡാറ്റയെല്ലാം സുരക്ഷിതമായി സി-ഡിറ്റിന്റെ സെര്‍വറിലേക്ക് മാറ്റിയിട്ടുണ്ട്. സ്പ്രിംക്ലറിന്റെ കൈവശമുള്ള ഡാറ്റയെല്ലാം നശിപ്പിക്കാനും സര്‍ക്കാര്‍ നിര്‍ദേശം നല്‍കി. ഇനി സോഫ്റ്റ് വെയര്‍ അപ്‌ഡേഷനില്‍ മാത്രമാകും സ്പ്രിംക്ലറിന് പങ്കാളിത്തമുണ്ടാവുക. ആ സമയത്തും കമ്പനിയ്ക്ക് സി-ഡിറ്റിന്റെ പക്കലുള്ള വിവരങ്ങളൊന്നും കാണാനാവില്ലെന്നും സത്യവാങ്മൂലത്തില്‍ പറയുന്നു.
കൊവിഡ് രോഗികളുടെ വിവരങ്ങള്‍ ചോര്‍ന്നുവെന്ന് ആരോപിച്ച് വിവാദം സര്‍ക്കാരിന് വലിയ തലവേദനയുണ്ടാക്കിയിരുന്നു. സര്‍ക്കാര്‍ പ്രതിക്കൂട്ടില്‍ നിന്നിരുന്ന ഈ പശ്ചാത്തലത്തിലാണ് സര്‍ക്കാര്‍ സ്പ്രിംക്ലറിനെ ഒഴിവാക്കിയതായി സത്യവാങ്മൂലം സമര്‍പ്പിച്ചിരിക്കുന്നത്.
