വയനാട്: വയനാട്ടില് കടുവയുടെ ആക്രമണത്തില് ഒരാള് മരണപ്പെട്ട സംഭവത്തില് കടുവയെ കണ്ടെത്തുന്നതിനും തുടര്നടപടികള് സ്വീകരിക്കുന്നതിനും വനം വകുപ്പ് നടപടികള് ആരംഭിച്ചതായി വനം മന്ത്രി എ.കെ ശശീന്ദ്രന്. മൃതദേഹം ആശുപത്രിയിലേക്ക് മാറ്റുന്നതിനും മറ്റ് തുടര്നടപടികളും വനം വകുപ്പ് നടത്തും.
കടുവയെ തിരിച്ചറിയുന്നതിന് വനത്തിനകത്ത് വിവിധ സ്ഥലങ്ങളില് ക്യാമറ ട്രാപ്പികള് ഉടന് സ്ഥാപിക്കുന്നതിന് നിര്ദ്ദേശം നല്കിയതായി മന്ത്രി പറഞ്ഞു. ജില്ലാ വികസന സമിതി അടിയന്തരമായി വിളിച്ചു ചേര്ത്ത് ആവശ്യമായ തുടര്നടപടികള് ജില്ലാ കളക്ടര്ക്ക് നിര്ദ്ദേശം നല്കി. എല്ലാ ഉന്നതികളില് താമസിക്കുന്നവര്ക്കും ജാഗ്രതാ നിര്ദ്ദേശവും ആവശ്യമായ സംരക്ഷണവും നല്കാന് വനം ഉദ്യോഗസ്ഥര്ക്ക് നിര്ദ്ദേശം നല്കിയിട്ടുണ്ടെന്നും മന്ത്രി അറിയിച്ചു.
