തിരുവനന്തപുരം: ഭക്ഷണത്തില്‍ ഒച്ചിനെ കണ്ടതിനെ തുടര്‍ന്ന് തിരുവനന്തപുരത്ത് ഭക്ഷ്യസുരക്ഷാ വകുപ്പ് ഹോട്ടല്‍ പൂട്ടിച്ചു. ഭക്ഷണശാലയുടെ വൃത്തിഹീനമായ അവസ്ഥയെ തുടര്‍ന്ന് തിരുവനന്തപുരം നഗരസഭ ഹോട്ടലിനെതിരെ കേസെടുത്തു.
തിരുവനന്തപുരം വഴുതക്കാട് ശ്രീ െഎശ്വര്യ ഹോട്ടലില്‍ പ്രഭാത ഭക്ഷണം കഴിക്കാനെത്തിയ യുവതിക്കാണ് കടലക്കറിയില്‍ നിന്നും ഒച്ചിനെ കിട്ടിയത്. തുടര്‍ന്ന് ഹോട്ടല്‍ അധികൃതരെ അറിയിച്ചെങ്കിലും കക്കയാണെന്നായിരുന്നു മറുപടി. സസ്യാഹാരം മാത്രം വിളമ്പുന്ന ഹോട്ടലില്‍ കക്കവിളമ്പിയതിനെ കുറിച്ചുള്ള ന്യായീകരണം വിശ്വസിക്കാതെ നടത്തിയ പരിശോധനയില്‍ ഒച്ചു തന്നെയെന്ന് തെളിഞ്ഞു.
തുടര്‍ന്ന് ഭക്ഷ്യസുരക്ഷാ വകുപ്പും നഗരസഭ അധികൃതരും നടത്തിയ പരിശോധനയില്‍ ഹോട്ടല്‍ തീര്‍ത്തും വൃത്തിഹീനമാണെന്നും ദിവസങ്ങള്‍ പഴകിയ തൈര് വരെ ഉപയോഗിക്കുന്നുണ്ടെന്നും കണ്ടെത്തി. പാകം ചെയ്ത ഭക്ഷണം വൃത്തിഹീനമായ സ്ഥലത്ത് തുറന്ന് വെച്ച നിലയിലായിരുന്നു.
