നെയ്യാറ്റിൻകരയിൽ കോളറ സ്ഥിരീകരിച്ചു. തവരവിളയിലെ ഭിന്നശേഷി ഹോസ്റ്റലിലുള്ള അന്തേവാസിക്കാണ് കോളറ സ്ഥിരീകരിച്ചത്. 10 വയസ്സുകാരനാണ് രോഗബാധ. കഴിഞ്ഞ ദിവസം കോളറ ലക്ഷണങ്ങളോടെ ഹോസ്റ്റലിലെ 26കാരനായ അനു മരിച്ചിരുന്നു. എന്നാല്‍, അനുവിന് കോളറ സ്ഥിരീകരിക്കാനായിരുന്നില്ല. അനുവിന്‍റെ സ്രവ സാമ്പിള്‍ ഉള്‍പ്പെടെ പരിശോധിക്കാനായിരുന്നില്ല.
വെള്ളിയാഴ്ച രാത്രിയിലാണ് ഹോസ്റ്റലിലെ 26കാരൻ മരിച്ചത്. ഛർദിയും വയറിളക്കവും അനുഭവപ്പെട്ട ഇദ്ദേഹം മരണപ്പെടുകയായിരുന്നു. മരണകാരണം കോളറ ആണോയെന്ന കാര്യത്തിൽ സ്ഥിരീകരണം വന്നിട്ടില്ല.
പത്തു വയസുകാരന് കോളറ സ്ഥിരീകരിച്ചതോടെ ഉറവിടം കണ്ടെത്താനുള്ള പരിശോധനയും ആരോഗ്യവകുപ്പ് ആരംഭിച്ചിട്ടുണ്ട്. രോഗം സ്ഥിരീകരിച്ച പത്തു വയസുകാരന്‍റെ ആരോഗ്യനില തൃപ്തികരമാണ്. കാരുണ്യ ഹോസ്റ്റലിലെ പത്തു പേര്‍ രോഗ ലക്ഷണങ്ങളോടെ ചികിത്സയിലാണ്.
