തൃശ്ശൂര്: തെരഞ്ഞെടുപ്പ് പ്രചാരണത്തിനിടെ തൃശ്ശൂരിലെ എന്ഡിഎ സ്ഥാനാര്ത്ഥി സുരേഷ്ഗോപി നടത്തിയ പഞ്ച് ഡയലോഗാണ് സോഷ്യല്മീഡിയയില് ട്രോളന്മാര് ഏറ്റെടുത്തിരുന്നത്. ‘എനിക്ക് ഈ തൃശൂര് വേണം. നിങ്ങള് എനിക്ക് തൃശൂര് തരണം. ഈ തൃശൂര് ഞാനിങ്ങ് എടുക്കുവാ.’എന്നതായിരുന്നു സുരേഷ് ഗോപിയുടെ ക്ലാസ് ഡയലോഗ്.
ഇപ്പോഴിതാ ഈ പറച്ചില് സുരേഷ്ഗോപിക്ക് തന്നെ പുലിവാലാകുന്ന ഓഡിയോയാണ് പ്രചരിക്കുന്നത്. പരാതിയുമായി സുരേഷ് ഗോപിയെ ഫോണ്വിളിക്കുന്ന ഓഡിയോയാണ് പ്രചരിക്കുന്നത്. എന്നാല് ഇതിന് മറുപടി നല്കുന്നത് സുരേഷ്ഗോപിയാണോ അതോ അദ്ദേഹത്തിന്റെ ശബ്ദത്തില് മറുപടി നല്കുന്നതാണോ എന്ന് വ്യക്തമല്ല. പക്ഷേ ഓഡിയോയിലെ ചോദ്യവും ഉത്തരവും വൈറലാണ്.
തന്റെ പിതാവിനെ അടക്കിയിരിക്കുന്നത് പേരാമ്പ്രയിലാണ് അതിനാല് ആറടി മണ്ണ് തൃശ്ശൂരില് തരണമെന്നാണ് ഫോണിലൂടെ വിളിച്ച ആള് സുരേഷ് ഗോപിയോട് ചോദിക്കുന്നത്. കാണികള്ക്ക് കൗതുകം തോന്നുന്നെങ്കിലും അല്പം ഗൗരവത്തോടെ ആയിരുന്നു സുരേഷ് ഗോപി ഈ വിഷയത്തെ കൈകാര്യം ചെയ്തത്.
സംഭാഷണം ഇങ്ങനെ:
ചോദ്യം: ഹലോ സുരേഷ്ഗോപി സാറല്ലേ..
മറുപടി: അതേ സുരേഷ് ഗോപിയാണ്..ആരാണ്?
ചോദ്യം: സാറെ ഞാന് പേരാമ്പ്ര എന്ന സ്ഥലത്ത് നിന്നാ വിളിക്കുന്നേ..സാറെ എല്ലാവരും പറയുന്നു തൃശ്ശൂര് സാറങ്ങ് എടുത്തെന്ന്… സാറെ എന്റെ അച്ഛനെ അടക്കിയത് പേരാമ്പ്രയിലാ.. ഞാന് വര്ഷത്തിലൊരിക്കല് മെഴുകുതിരി കത്തിക്കാന് പോകുന്നതാ.. സാറെ പേരാമ്പ്ര ഒഴിച്ച് ബാക്കി എല്ലാം എടുത്തോ സാറെ.
മറുപടി: അല്ല നിങ്ങളെന്നെ കളിയാക്കാന് വിളിക്കുവാണോ?.
ചോദ്യം: സത്യമായും അല്ല സാറെ.. അച്ഛന് ഉറങ്ങുന്ന ആറടി മണ്ണ് മാത്രം ബാക്കി വച്ചിട്ട് ബാക്കി സാറെടുത്തോ. സാറ് തൃശൂര് മൊത്തം കൊണ്ടുപോയാല് ഞാന് എവിടെ പോയി മെഴുകുതിരി കത്തിക്കും.
മറുപടി: ഇല്ല. എനിക്ക് തൃശൂര് മൊത്തം വേണം. തൃശൂര് ഞാനിങ്ങ് എടുക്കുവാ എന്നല്ലേ പറഞ്ഞത്. തൃശൂര് എല്ലാം എനിക്ക് വേണം.
ചോദ്യം: അങ്ങനെ പറയല്ലേ സാറെ. ആറടി മണ്ണെങ്കിലും തരണം..പ്ലീസ്
മറുപടി: നല്ല തിരക്കിലാണ്.. തൃശൂര് എനിക്ക് മൊത്തം വേണം. അതിനപ്പുറം ഒന്നുമില്ല. തൃശൂര് ഞാനിങ്ങ് എടുക്കുവാ…
