കണ്ണൂര്‍: പ്രധാനമന്ത്രി നരേന്ദ്ര മോദിക്ക് ഇക്കുറി കേരളം ഔദ്യോഗികമായി സമ്മാനിക്കുന്ന ഓണക്കോടി കണ്ണൂരില്‍ നിന്നും. കേരളത്തിന്റെ സ്വന്തം കൈത്തറി തുണി കൊണ്ടുള്ള കുര്‍ത്തയാണ് സമ്മാനിക്കുന്നത്. കണ്ണൂരില്‍ തുണിയുടെ നെയ്ത്തു ജോലികള്‍ ഇന്നോടെ പൂര്‍ത്തിയാവും. തിരുവനന്തപുരത്തെ തുന്നല്‍ കേന്ദ്രത്തിലാണ് കുര്‍ത്ത തയ്ക്കുന്നത്.
കണ്ണൂര്‍ ചൊവ്വയിലെ ലോക്‌നാഥ് കോ ഓപ്പ് വീവിങ് സൊസൈറ്റിയാണ് ഓണക്കോടിക്കുള്ള തുണി നെയ്യുന്നത്. കെ ബിന്ദുവാണ് കുര്‍ത്ത തുണി നെയ്യുന്നത്. കോട്ടയം സ്വദേശിയും പാലക്കാട് കൊടുമ്പ് കൈത്തറി ക്ലസ്റ്ററിലെ ഡിസൈനറുമായ അഞ്ജു ജോസാണ് കുര്‍ത്ത തുണിയുടെ നിറങ്ങളും പാറ്റേണും രൂപകല്‍പ്പന ചെയ്തത്. ഇളം പച്ച, വോള്ള, റോസ്, ചന്ദന നിറം എന്നിവയോടൊപ്പം ഇളം തളിരിലയുടെ നിറം കൂടി ഒത്തുചേര്‍ന്നു കുത്തനെ വരകളോടു കൂടിയതാണ് കുര്‍ത്ത.
അതീവ ശ്രദ്ധ വേണ്ട ജോലിയാണ് നെയ്ത്ത്. ഒരു ദിവസം മൂന്ന് മീറ്റര്‍ തുണിയേ ഒരുക്കാന്‍ സാധിക്കു. തിങ്കളാഴ്ച തുണി തിരുവനന്തപുരത്തെത്തിക്കും. ദേശീയ കൈത്തറി ദിനമാണ് തിങ്കളാഴ്ച. തിരുവനന്തപുരത്തെ തുന്നല്‍ കേന്ദ്രത്തിലാണ് കുര്‍ത്ത തയ്ക്കുന്നത്. മോദിക്കൊപ്പം മറ്റ് ചില പ്രമുഖര്‍ക്കും ഓണക്കോടി സമ്മാനിക്കും.
