ന്യൂഡല്ഹി: കടയ്ക്കാവൂര് പോക്സോ കേസിലെ ഇരയുടെ പേര് വെളിപ്പെടുത്തിയതിന് യൂ ട്യൂബര് സൂരജ് പാലാക്കാരനെതിരെ രജിസ്റ്റര് ചെയ്ത പോക്സോ കേസ് സുപ്രീം കോടതി ഉപാധികളോടെ റദ്ദാക്കി. ഇത്തരം നടപടികള് ഇനി ഉണ്ടാകില്ലെന്ന ഉറപ്പ് സൂരജ് പാലാക്കാരന് വിചാരണ കോടതിയിലും, പോലീസ് സ്റ്റേഷനിലും നല്കണം. ഉറപ്പ് ലംഘിച്ചാല് കേസിലെ നടപടികള് പുനഃസ്ഥാപിക്കുമെന്ന് ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ് മാല ബാഗ്ചി എന്നിവര് അടങ്ങിയ ബെഞ്ച് മുന്നറിയിപ്പ് നല്കി.
പേര് വെളിപ്പെടുത്തിയതില് ഇരക്ക് വിഷമം ഉണ്ടെങ്കില് നിരുപാധികം മാപ്പ് പറയുന്നതായി സുപ്രീം കോടതിയില് ഫയല് ചെയ്ത മറുപടി സത്യവാങ്മൂലത്തില് സൂരജ് പാലാക്കാരന് അറിയിച്ചിരുന്നു. ഇക്കാര്യം അദ്ദേഹത്തിന്റെ അഭിഭാഷകന് അഡോള്ഫ് മാത്യൂസ് ഇന്ന് കോടതിയുടെ ശ്രദ്ധയില് പെടുത്തിയിരുന്നു. തുടര്ന്നാണ് കര്ശന ഉപാധികളോടെ കേസ് റദ്ദാക്കാന് ചീഫ് ജസ്റ്റിസ് അധ്യക്ഷനായ ബെഞ്ച് നിര്ദേശിച്ചത്. സംസ്ഥാന സര്ക്കാരിന് വേണ്ടി അഭിഭാഷകന് ഹര്ഷദ് വി ഹമീദ് ഹാജരായി.
