ചങ്ങനാശേരി: ചെറിയ പനിയില്‍ നിന്നും തുടങ്ങിയ രോഗങ്ങളാണ് സുകുവിന്റെ ജീവിതത്തിന്റെ ചുവടുകള്‍ തെറ്റിച്ചത്. ഭാര്യയും രണ്ട് കുട്ടികളും ഉള്‍പ്പെടുന്ന സന്തുഷ്ട കുടുംബത്തിന്റെ ജീവിതത്തിന്റെ താളം തെറ്റി തുടങ്ങിയത് കഴിഞ്ഞ ജൂണ്‍ 22 മുതലാണ്. മല്ലപ്പള്ളി ആനിക്കാട് വിലങ്ങ്പാറ വീട്ടില്‍ വി എന്‍ സുകു (54) വിനും കുടുംബത്തിനുമാണ് ഈ ദുരിതം. ഡെങ്കിപ്പനിയില്‍ നിന്നും പിന്നീട് മറ്റ് രോഗങ്ങളുടെ പിടിയില്‍ അകപ്പെടുകയായിരുന്നു. രോഗം മൂര്‍ച്ഛിച്ഛത്തോടെ ശരീരത്തിലെ പ്രധാന ഭാഗങ്ങളായ ഹാര്‍ട്ട്, ലിവര്‍, കിഡ്നി എന്നിവയെ ബാധിക്കുകയും ചെയ്തു.
ഇരുട്ടടി പോലെ കാര്‍ഡിയാക അറസ്റ്റും ഉണ്ടായി. കോട്ടയം മെഡിക്കല്‍ കോളേജില്‍ ആശുപത്രിയില്‍ പ്രവേശിപ്പിച്ച സുകു ഏഴ് ദിവസം ഐ സി യുവില്‍ ചികികത്സയിലായിരുന്നു. പെട്ടെന്നുണ്ടായ കാര്‍ഡിയാക് അറസ്റ്റില്‍ സുകുവിന്റെ നില വഷളാകുകയും ചെയ്തു. വെന്റിലേറ്റര്‍ സൗകര്യം ഇല്ലാതെ ജീവന്‍ നിലനിര്‍ത്താന്‍ കഴിയില്ല എന്ന സ്ഥിതിയിലായി. മെഡിക്കല്‍ കോളേജ് ആശുപത്രിയില്‍ കൊവിഡ് രോഗികളുടെ എണ്ണം വര്‍ധിച്ചതും വെന്റിലേറ്റര്‍ സൗകര്യം ലഭിക്കാതാകുകയും ചെയ്തതോടെ, അധികൃതരുടെ നിര്‍ദേശപ്രകാരം വെന്റിലേറ്റര്‍ സൗകര്യം ലഭ്യമായുള്ള സ്വകാര്യ ആശുപത്രിയിലേക്ക് ചികിത്സയ്ക്കായി മാറ്റേണ്ടി വന്നു. ഒന്നരമാസം പൂര്‍ണ്ണമായും ഐ സി യുവില്‍ ചികിത്സയില്‍ കഴിഞ്ഞു. കൂടാതെ തൊണ്ടയില്‍ സര്‍ജറി നടത്തുകയും ചെയ്തു.
സാമ്പത്തികമായി പിന്നോക്കം നില്ക്കുന്ന സുകുവിന്റെ കുടുംബത്തിന് സ്വകാര്യ ആശുപത്രിയിലെ ചികിത്സാ ചെലവ് താങ്ങാവുന്നതിനും അപ്പുറമായിരുന്നു. പത്തര ലക്ഷം രൂപ സ്വകാര്യ ആശുപത്രിയിലെ ചികിത്സയ്ക്കായി ചെലവായി. ഈ തുക കണ്ടെത്തുന്നതിനുള്ള പ്രയാസത്തിലാണ് സുകുവിന്റെ കുടുംബം. പലരില്‍ നിന്നും കടംവാങ്ങിയും ബന്ധുക്കളുടെ കാരുണ്യത്തിലുമാണ് ഇതുവരെ ചികിത്സ മുന്നോട്ടുകൊണ്ടുപോയത്. നാലുമാസം കൂടെ ചികിത്സ തുടര്‍ന്നാല്‍ മാത്രമേ സുകുവിന് എഴുന്നേറ്റ് നടക്കാന്‍ സാധിക്കുകയുള്ളൂ.
സ്വന്തമായി വീടില്ലാത്തതിനാല്‍ പഞ്ചായത്തില്‍ നിന്നും വീടിനായി അനുവദിച്ച തുകയും ചികിത്സയുടെ ആവശ്യത്തിനായി എടുക്കേണ്ടി വന്നു. ഇതോടെ വീടിന്റെ നിര്‍മ്മാണവും പാതിവഴിയിലായി. സ്വയം തൊഴിലിനായി എടുത്ത ലോണ്‍ തുക കൊണ്ട് തൊഴില്‍ സംരംഭം തുടങ്ങുവാന്‍ സാധിക്കാതെ വന്നതും തിരിച്ചടക്കാന്‍ കഴിയാതെ വന്നതോടെയും പാതിവഴിയിലായ വീട് ജപ്തി നടപടിയിലാണ്. കിടപ്പാടം ഇല്ലാത്തതിനാല്‍ ബന്ധുവീട്ടിലാണ് രണ്ട് കുട്ടികളും ഭാര്യയുമായി അഭയം പ്രാപിച്ചിരിക്കുന്നത്. ആശുപത്രിയില്‍ കിടന്നുള്ള ചികിത്സ തുടര്‍ന്നാല്‍ ബില്‍ തുക വര്‍ധിക്കുന്നതിനാല്‍ അടയ്ക്കേണ്ട തുകയുടെ കാല്‍ ഭാഗം മാത്രം അടച്ചശേഷം ആശുപത്രിയുമായി എഗ്രിമെന്റ് ചെയ്തശേഷമാണ് ഡിസ്ചാര്‍ജ് അനുവദിച്ചത്.
ഏഴാ ക്ലാസില്‍ പഠിക്കുന്ന മകനും ആറാം ക്ലാസില്‍ പഠിക്കുന്ന മകളും ഭാര്യ ഗീതയും അടങ്ങുന്ന സുകുവിന്റെ കുടുംബത്തിന് മുന്നോട്ടുള്ള ജീവിതത്തിനും ചികിത്സയ്ക്കുമായി സുമനസ്സുകളുടെ കാരുണ്യം തേടുന്നു.
- ബാങ്ക് ഡിറ്റെയ്ല്‍സ്
- പേര് : ഗീത സുകു > ബാങ്ക് : കാത്തലിക് സിറിയന്‍ ബാങ്ക്
- ബ്രാഞ്ച് : പുന്നവേലി > അക്കൗണ്ട് നമ്പര്‍: 0170-03330556190701
- ഐ എഫ് സി : CSBK0000170 > ഫോണ്‍ : 7902549760.
