പെരുമ്പാവൂര് : മുടക്കുഴ ഗ്രാമ പഞ്ചായത്തിലെ പുഴുക്കാട് ഗവ. എല്.പി സ്കൂളിന് അനുവദിച്ച പുതിയ അക്കാദമിക്ക് ബ്ലോക്ക് നിര്മ്മാണം ആരംഭിച്ചു. അഡ്വ. എല്ദോസ് കുന്നപ്പിള്ളി എം.എല്.എ നിര്മ്മാണോദ്ഘാടനം നിര്വഹിച്ചു. ഈ വര്ഷത്തെ എം.എല്.എ ഫണ്ടില് നിന്നും അനുവദിച്ച 22.57 ലക്ഷം രൂപ വിനിയോഗിച്ചാണ് നിര്മ്മാണം. രണ്ട് ക്ലാസ് മുറികള് ഉള്പ്പെടെ 1023 ചതുരശ്രയടി ചുറ്റളവിലാണ് കെട്ടിടം നിര്മ്മിക്കുന്നത്. ഭാവിയില് രണ്ട് നിലകളില് കൂടി നിര്മ്മാണ പ്രവര്ത്തനങ്ങള് നടത്തുന്നതിന് ഉതകുന്ന രീതിയിലാണ് പദ്ധതി തയ്യാറാക്കിയത്.
മുടക്കുഴ ഗ്രാമപഞ്ചായത്തില് ലോവര് പ്രൈമറി വിഭാഗത്തിലെ പ്രധാനപ്പെട്ട വിദ്യാലയമായ പുഴുക്കാട് ഗവ. എല്. പി സ്കൂള് സ്ഥാപിച്ചിട്ടു കഴിഞ്ഞ വര്ഷം 100 വര്ഷം പിന്നിട്ടിരുന്നു. പ്രി പ്രൈമറി മുതല് നാലാം ക്ലാസ് വരെ 5 ഡിവിഷനുകളിലായി 102 കുട്ടികള് 1917 ല് സ്ഥാപിതമായ ഈ സ്കൂളില് പഠിക്കുന്നുണ്ട്. കാലപ്പഴക്കം മൂലം ക്ലാസ് മുറികള് കാലഹരണപ്പെട്ടതിനെ തുടര്ന്നാണ് മണ്ഡലത്തിലെ വിദ്യാഭ്യാസ മേഖലയില് നടപ്പിലാക്കുന്ന ഇന്സ്പെയര് പെരുമ്പാവൂര് പദ്ധതിയുടെ ഭാഗമായി പുതിയ അക്കാദമിക്ക് ബ്ലോക്ക് നിര്മ്മാണത്തിന് തുക അനുവദിച്ചത്.
ഗ്രാമ പഞ്ചായത്ത് പ്രസിഡന്റ് ഷൈമി വര്ഗീസ് അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്റ് മിനി ബാബു, വൈസ് പ്രസിഡന്റ് കെ.പി വര്ഗീസ്, ഗ്രാമ പഞ്ചായത്ത് വൈസ് പ്രസിഡന്റ് എ.ടി അജിത് കുമാര്, ആസൂത്രണ സമിതി ഉപാധ്യക്ഷന് പി.പി അവറാച്ചന്, പ്രധാനാധ്യാപിക എ.എം അന്നക്കുട്ടി, പി.ടി.എ പ്രസിഡന്റ് എന്.കെ.പി നമ്പൂതിരി എന്നിവര് ചടങ്ങില് പ്രസംഗിച്ചു.
