കോഴിക്കോട്: പോക്സോ കേസിലെ പ്രതിയെ ജാമ്യത്തിലെടുക്കുന്നതിനായി വ്യാജ നികുതി ശീട്ടുകള് നല്കി കോടതിയെ കബളിപ്പിച്ച രണ്ട് പേരെ കോഴിക്കോട് ടൗണ് പൊലീസ് അറസ്റ്റ് ചെയ്തു. തിരുവനന്തപുരം മലയിന് കീഴ് പുതുവല് പുത്തന് വീട്ടില് സുധാകുമാര്, കുടപ്പാമൂട് റോഡരികത്ത് വീട്ടില് ഉണ്ണികൃഷ്ണന് എന്നിവരാണ് പിടിയിലായത്.
തൊട്ടില്പാലം പൊലീസ് സ്റ്റേഷനില് രജിസ്റ്റര് ചെയ്ത പോക്സോ കേസിലെ പ്രതിയായ ഝാര്ഖണ്ഡ് സ്വദേശി നസറുദ്ദീനെയാണ് ഇവര് ജാമ്യത്തിലെടുക്കുന്നതിനായി വ്യാജ നികുതി ശീട്ടുകള് കോടതിക്ക് നല്കിയത്. 2018ലായിരുന്നു കേസിനാസ്പദമായ സംഭവം. പ്രതിയെ ജാമ്യത്തില് എടുക്കുന്നതിനായി കോഴിക്കോട് അഡീഷണല് ഡിസ്ട്രിക്റ്റ് ആന്റ് സെഷന്സ് കോടതിയില് വ്യാജ രേഖകള് ഹാജരാക്കി പ്രതിയെ ജാമ്യത്തിലിറക്കി കോടതിയെ വഞ്ചിക്കുകയായിരുന്നു.
കേസിലെ പ്രതിയായ നസറുദ്ദീന് കോടതിയില് ഹാജരാകാത്തതിനെ തുടര്ന്ന് പ്രതിക്കെതിരെ കോടതി വാറണ്ട് പുറപ്പെടുവിക്കുകയും, ജാമ്യകാര്ക്കെതിരെ വില്ലേജ് ഓഫീസ് മുഖേന നടപടി എടുക്കുന്നതിനായി നോട്ടീസ് അയക്കുകയും ചെയ്തപ്പോഴാണ് നെടുമങ്ങാട് തഹസില്ദാര് ഇവര് സമര്പ്പിച്ച രേഖകള് വ്യാജമാണെന്ന് കോടതിയെ അറിയിച്ചത്. കോടതിയുടെ പരാതിയില് കോഴിക്കോട് ടൗണ് പൊലീസ് കേസ് റജിസ്റ്റര് ചെയ്തു. തുടര്ന്ന് ഒളിവില് കഴിയുന്ന പ്രതികളെ തിരുവനന്തപുരത്ത് വെച്ച് പൊലീസ് പിടികൂടുകയായിരുന്നു. പ്രതികള്ക്കെതിരെ വഞ്ചിയൂര് കോടതിയിലും സമാനമായ കേസ് ഉണ്ട്.
