ഫേസ്ബുക്കിലൂടെ മോശം പറയുന്നവര്‍ക്ക് മറുപടിയേകുന്ന സ്വഭാവമാണ് തന്റേതെന്ന് നടി അനുശ്രീ. ബിഹൈന്‍ഡ് വുഡ്്സിന് നല്‍കിയ അഭിമുഖത്തിലായിരുന്നു താരം ഇതേക്കുറിച്ച് സംസാരിച്ചത്. മുന്‍പൊരിക്കല്‍ സഹോദരനൊപ്പം ഫോട്ടോ പോസ്റ്റ് ചെയ്തപ്പോള്‍ മോശം പറഞ്ഞയാള്‍ക്ക് മാന്യമായ ഭാഷയില്‍ തന്നെ മറുപടിയേകിയിരുന്നു. സാരിയും ദാവണിയുമൊക്കെയായി നാടന്‍ ലുക്കിലുള്ള ചിത്രങ്ങളാണ് ഫേസ്ബുക്കില്‍ പോസ്റ്റ് ചെയ്യാറുള്ളത്. മോഡേണ്‍ വേഷങ്ങളൊക്കെ അണിഞ്ഞുള്ള ചിത്രങ്ങള്‍ പങ്കുവെക്കാന്‍ നല്ലത് ഇന്‍സ്റ്റഗ്രാം ആണെന്നും താരം പറയുന്നു.
വ്യക്തി ജീവിതത്തിലെ കാര്യങ്ങളെക്കുറിച്ച് മാത്രമല്ല കരിയറിനെക്കുറിച്ചും അനുശ്രീ സംസാരിച്ചിരുന്നു. സത്യന്‍ അന്തിക്കാടിന്റെ സിനിമയില്‍ അഭിനയിക്കുകയെന്നുള്ളത് ജീവിതത്തിലെ വലിയ സ്വപ്നങ്ങളിലൊന്നാണെന്ന് താരം പറയുന്നു.
ഫേസ്ബുക്കില്‍ നിന്നും അങ്ങനെ പോസിറ്റീവ് കമന്റുകളൊന്നും കിട്ടാറില്ല. എന്തോ അങ്ങനെയാണ്. ഇന്‍സ്റ്റഗ്രാമിലാണ് ഞാന്‍ കൂടുതലും ചിത്രങ്ങള്‍ പോസ്റ്റ് ചെയ്യാറുള്ളത്. സാരിയോ പട്ടുപാവാടയോ ചുരിദാറോ ഇട്ട് പൂവൊക്കെ വെച്ചുള്ള ഫോട്ടോയാണെങ്കില്‍ ഞാന്‍ അത് ഫേസ്ബുക്കില്‍ പോസ്റ്റ് ചെയ്യും. അല്ലാത്ത ഫോട്ടോ ഇടുകയാണെങ്കില്‍ ഞാന്‍ കമന്റ് ബോക്സ് ഓഫ് ചെയ്യും. എന്തിനാണ് നീ കമന്റ് വായിച്ച് വിഷമിക്കുന്നത്, അത് നോക്കാതിരുന്നാല്‍പ്പോരെ എന്ന് ചോദിക്കുന്നവരുണ്ട്. പക്ഷേ, അങ്ങനെയല്ല എനിക്കത് വിഷമമാണ്. അവരങ്ങനെ പറഞ്ഞു, ഇങ്ങനെ പറഞ്ഞു എന്നോര്‍ത്ത് ഞാന്‍ വിഷമിക്കും.
ദേഷ്യം വരുന്ന കമന്റാണെങ്കില്‍ അതിന് ഞാന്‍ മറുപടി കൊടുക്കും. ലോക്ഡൗണ്‍ സമയത്ത് എന്റെ ബ്രദര്‍ എനിക്ക് മുടിയില്‍ സ്പാ ക്രീം ഇട്ട് തരുന്നൊരു ഫോട്ടോ ഇട്ടിട്ടുണ്ടായിരുന്നു. ഞാന്‍ ഭയങ്കര ഇഷ്ടം തോന്നി ഇട്ട ഫോട്ടോയാണ്. നാത്തൂന്‍ ക്ലിക്ക് ചെയ്ത ഫോട്ടോയായിരുന്നു. അത് നല്ല രസമുള്ളതായിരുന്നു. അത് ഞാന്‍ പോസ്റ്റ് ചെയ്തിരുന്നു. അത് ന്യൂസ് ഫീഡിലെന്തോ വന്നപ്പോള്‍ അണ്ണന്‍ എനിക്ക് ഷെയര്‍ ചെയ്ത് തന്നു. അണ്ണനും അതിന്റെ കമന്റുകളൊന്നും നോക്കിയിരുന്നില്ല. ഞാനാണെങ്കില്‍ അതാണ് നോക്കിയത്. ഇത്ര വയസായിട്ടും കെട്ടിക്കാതെ ആങ്ങളെ പെങ്ങള്‍ക്ക് എണ്ണയും ഇട്ടുകൊടുത്തോണ്ടിരിക്കുകയാണ്. പെങ്ങളെ വിറ്റ് ജീവിക്കാന്‍ നാണമില്ലേ എന്ന് പറഞ്ഞ് കുറേ കമന്റുകളുണ്ടായിരുന്നു. അത് കണ്ടപ്പോള്‍ എനിക്ക് സഹിക്കാനായില്ല. ഉടനെ തന്നെ ഞാന്‍ ലൈവിലൂടെയായി മറുപടി കൊടുക്കുകയായിരുന്നു. മോശം കമന്റുകള്‍ പോസ്റ്റ് ചെയ്തവരുടെ ഐഡി എടുത്ത് പറഞ്ഞാണ് സംസാരിച്ചത്.
ഞാന്‍ നിങ്ങളുടെ വീട്ടില്‍ അല്ലല്ലോ പുര നിറഞ്ഞ് നില്‍ക്കുന്നത്. എന്റെ ചേട്ടന്‍ എണ്ണ ഇട്ട് തരുന്നതിന് നിങ്ങള്‍ക്കെന്തെങ്കിലും പ്രശ്നമുണ്ടോ, പറയാനുള്ളത് മാന്യമായ ഭാഷയില്‍ അങ്ങ് പറഞ്ഞു. പ്രതികരണ ശേഷി എനിക്ക് കുറച്ച് കൂടുതലാണ്. അച്ഛനേയും അമ്മയേയും പറഞ്ഞാല്‍ ഞാന്‍ അടങ്ങിയിരിക്കില്ല. ഇന്‍സ്റ്റഗ്രാമില്‍ എപ്പോഴും ആക്ടീവാണ്. നല്ല സപ്പോര്‍ട്ടും കിട്ടാറുണ്ട്. എന്റെ കൂടെയുള്ളവര്‍ക്കൊക്കെ എന്നും ജോലിയാണ്. എനിക്ക് മാത്രമേ തിരക്കില്ലാത്തതുള്ളൂ. പരിപാടികളൊന്നുമില്ലെങ്കില്‍ നാട്ടിലേക്ക് പോവാറാണ് പതിവ്. സത്യന്‍ അന്തിക്കാടിനൊപ്പം സിനിമ ചെയ്യാന്‍ ഒത്തിരി ആഗ്രഹമാണ്. അത് ഞാന്‍ അദ്ദേഹത്തോട് പറഞ്ഞിട്ടുമുണ്ട്. എന്നെ വിളിക്കുന്നില്ലേ എന്ന് ഞാന്‍ അദ്ദേഹത്തോട് ചോദിക്കാറുണ്ടെന്നും അനുശ്രീ പറഞ്ഞു.
