ലണ്ടന്: ആന്റണി എന്ന ചിത്രത്തിന്റെ പ്രമോഷന്റെ ഭാഗമായി ലണ്ടനിലെത്തിയ നടന് ജോജു ജോര്ജും സംഘവും മോഷണത്തിനിരയായി. താരത്തിന്റെ പാസ്പോര്ട്ടും പണവും മോഷണം പോയി. സംഭവത്തില് ലണ്ടനിലെ ഇന്ത്യന് ഹൈക്കമ്മിഷന് ഇടപെട്ടു.
ആന്റണി’യുടെ നിര്മാതാവ് ഐന്സ്റ്റീന് സാക്ക് പോളിന്റെയും എക്സിക്യൂട്ടീവ് പ്രൊഡ്യൂസര് ഷിജോ ജോസഫിന്റെയും പണവും പാസ്പോര്ട്ടുകളും നഷ്ടമായിട്ടുണ്ട്. ആകെ 15,000 പൗണ്ട് (ഏകദേശം 15 ലക്ഷം രൂപ) മോഷണം പോയെന്നാണ് വിവരം. പാര്ക്കിങ്ങിലുണ്ടായിരുന്ന കാറില്നിന്നാണ് പണവും പാസ്പോര്ട്ടും ഷോപ്പിങ് സാധനങ്ങളും ലാപ്ടോപ്പുമെല്ലാം നഷ്ടമായത്.
ലണ്ടനിലെ ബിസ്റ്റര് വില്ലേജിലെ ഷോപ്പിങ്ങിനിടെയായിരുന്നു മോഷണം. പാര്ക്കിങ് കേന്ദ്രത്തില് വാഹനം നിര്ത്തി ഷോപ്പിങ്ങിന് പോയ ജോജുവും നിര്മാതാക്കളും തിരികെയെത്തിയപ്പോഴാണ് മോഷണം നടന്നതായി മനസിലാക്കിയത്. നടന് ചെമ്പന് വിനോദും നടി കല്യാണി പ്രിയദര്ശനും മറ്റൊരു കാറില് ഇവര്ക്കൊപ്പമുണ്ടായിരുന്നു. വില കൂടിയ ബ്രാന്ഡഡ് ഉത്പന്നങ്ങള് ലഭിക്കുന്ന ലണ്ടനിലെ ഇടങ്ങളിലൊന്നാണ് ബിസ്റ്റര് വില്ലേജ്.
ഇന്ത്യന് ഹൈക്കമ്മിഷന് ഇടപെട്ട് ജോജുവിനും നിര്മാതാക്കള്ക്കും താല്ക്കാലിക പാസ്പോര്ട്ട് നല്കി. സംഭവത്തിന് പിന്നാലെ ജോജുവും കല്യാണിയും നാട്ടിലേക്കു തിരിച്ചിട്ടുണ്ട്.