വിവാഹത്തിനു ശേഷം യുകെയിലേക്ക് ഭാര്യയോടൊപ്പം പോകാനായി, ഇന്ത്യന്‍ സ്‌പെഷ്യല്‍ മാര്യേജ് ആക്ട് പ്രകാരം വിവാഹം രജിസ്റ്റര്‍ ചെയുന്ന ഡേവിസും ഐലീനും എന്ന രണ്ട് കേന്ദ്ര കഥാപാത്രങ്ങള്‍. പക്ഷേ വിവാഹത്തിന് മണിക്കൂറുകള്‍ക്ക് മുമ്പ് വധു ആയ ഐലീന്‍ അവരുടെ മാര്യേജ് സെര്‍ട്ടിഫിക്കറ്റില്‍ ഒരു എക്‌സ്പയറി ഡേറ്റ് വേണമെന്ന ആവശ്യം മുന്നോട്ടു വെയ്ക്കുന്നു. കേള്‍ക്കുമ്പോള്‍ നിസ്സാരമെന്ന് തോന്നുമെങ്കിലും ഇന്ത്യയുടെ കുടുംബ സംവിധാനത്തെ തന്നെ ഇല്ലാതാക്കുന്ന ഒരു വിപ്ലവകരമായ ആശയം ആണ് ‘പി ഡബ്‌ള്യു ഡി’ എന്ന ചിത്രം കൊണ്ടുവന്നത്.
കോണ്‍വെര്‍സേഷണല്‍ ഡിബേറ്റ് എന്ന മലയാളത്തില്‍ അധികം പരിചയിച്ചിട്ടില്ലാത്ത ഒരു ജോണര്‍ ആണ് സിനിമയ്ക്ക് ഉള്ളത്. ഊട്ടിയിലെ മനോഹരമായ ഒരു ബംഗ്ലാവും അതിന്റെ പരിസരത്തുമാണ് കഥ നടക്കുന്നത് . ബ്രിട്ടീഷ് ഓസ്ട്രേലിയന്‍ സിനിമാട്ടോഗ്രാഫര്‍ സൂസന്‍ ലംസഡന്‍ ആദ്യമായി ചെയുന്ന ഇന്ത്യന്‍ സിനിമ കൂടിയാണ് ‘പി ഡബ്‌ള്യു ഡി’. ചിത്രത്തിന്റെ പ്രധാന ആകര്‍ഷണവും കളര്‍ഫുള്‍ വിഷുല്‍സ് തന്നെയാണ്. ‘ഐ ആം കാതലന്‍’ , ‘ജയ് മഹേന്ദ്രന്‍’ തുടങ്ങിയ ചിത്രങ്ങളിലൂടെ ശ്രദ്ധനേടിയ സിദ്ധാര്‍ത്ഥ പ്രദീപ് ആണ് സംഗീതം ഒരുക്കിയിരിക്കുന്നത്. ചിത്രത്തിന്റെ ആസ്വാദ്യത ഉയര്‍ത്തുന്നതില്‍ സിദ്ധാര്‍ത്ഥ പ്രദീപിന്റെ മ്യൂസിക് വളരെയധികം സഹായിക്കുന്നുണ്ട്.
മാറുന്ന കാലഘട്ടത്തില്‍ ഒരു ആശയം രസകരമായി അവതരിപ്പിക്കാന്‍, രണ്ടര മണികൂര്‍ ദൈര്‍ഘ്യം വലിച്ചു നീട്ടേണ്ട ആവശ്യമില്ല എന്ന് സംവിധായകനും എഴുത്തുകാരനുമായ ജോ ജോസഫ് സിനിമയുടെ പ്രാരംഭഘട്ടത്തില്‍ തന്നെ തീരുമാനിച്ചിരുന്നു. ഒരു മണിക്കൂറ് ദൈര്‍ഘ്യം ആണ് ചിത്രത്തിനുള്ളത്. മലയാളത്തിലെ ആദ്യത്തെ ഒടിടി മിനി ഫീച്ചര്‍ സിനിമ കൂടിയാണ് ‘പി ഡബ്‌ള്യു ഡി’. ശ്യാം ശശിധരന്റെ പുതുമയുള്ള എഡിറ്റിംഗ് പാറ്റേണ്‍ സിനിമയുടെ ഒഴുക്കിനെ വളരെ സഹായിക്കുന്നുണ്ട്.
വളരെ പുതുമ തോന്നുന്ന ഒരു ലൊക്കേഷന്‍ സെറ്റിങ്ങിന് ഇന്ത്യന്‍ നാഷണല്‍ അവാര്‍ഡ് വിന്നര്‍ ആയ സൗണ്ട് ഡിസൈനര്‍ സിനോയ് ജോസഫ് വിന്യസിച്ചിരിക്കുന്ന സൗണ്ട് ഡിസൈനും മികച്ചതാണ്. കളറിംഗ് നിര്‍വ്വഹിച്ചിരിക്കുന്നത് സ്റ്റേറ്റ് അവാര്‍ഡ് വിന്നര്‍ ലിജു പ്രഭാകറാണ്. അജയ് തുണ്ടത്തിലാണ് ചിത്രത്തിന്റെ പിആര്‍ഓ.
പി ഡബ്‌ള്യു ഡി സംസാരിക്കുന്ന വിഷയം എല്ലാത്തരം പ്രേക്ഷകരെയും ഒരുപോലെ രസിപ്പിക്കുമെന്ന് കരുതാന്‍ സാധിക്കില്ല. ചില സീനുകളിലെ സംഭാഷണങ്ങള്‍ ഹാസ്യാത്മകം ആണെങ്കിലും വളരെ കുറച്ചുപേരെ എങ്കിലും അത് അലോസരപ്പെടുത്താന്‍ സാധ്യതയുണ്ട്. പുതുമുഖം ആയ സുഹാസ് വിഷ്ണു അവതരിപ്പിച്ച ടോണി മത്തങ്ങാപറമ്പില്‍ എന്ന കഥാപാത്രം വളരെ മികച്ച പ്രകടനം ആയിരിന്നു എന്ന സോഷ്യല്‍ മീഡിയയില്‍ കമന്റുകള്‍ വരുന്നു എങ്കിലും, ആ കഥാപാത്രം മറ്റു ചിലരെ പ്രകോപനപരമായി അലോസരപ്പെടുത്തി എന്നും കമന്റുകളില്‍ നിന്ന് മനസിലാക്കാം. സിനിമ, വിവാഹം, മൈഗ്രേഷന്‍, മതം, അങ്ങനെ പലതിനെയും പരാമര്‍ശിച്ചും വിമര്‍ശിച്ചും ആണ് സിനിമ മുന്നേറുന്നതും അവസാനിക്കുന്നതും. പി ഡബ്‌ള്യു ഡി സൈനപ്ലേയില്‍ ലഭ്യമാണ്
