അഭിനേതാക്കളുടെ സംഘടനായ ‘അമ്മ’യുടെ ഐസിസിയില് നിന്ന് ശ്വേതാ മേനോനും കുക്കു പരമേശ്വരനും രാജിവെച്ചു. ബലാത്സംഗക്കേസില് പ്രതിയായ വിജയ് ബാബുവിനെതിരെയുള്ള നടപടികള് മയപ്പെടുത്തിയതില് പ്രതിഷേധിച്ചാണ് ഇരുവരുടെയും രാജി. സംഘടനയുടെ വൈസ് പ്രസിഡന്റ്, ഐസി കമ്മിറ്റി ചെയര്പേഴ്സണ് എന്നീ സ്ഥാനങ്ങള് വഹിക്കുന്ന വ്യക്തിയാണ് ശ്വേതാ മേനോന് എന്നത് ശ്രദ്ധേയമാണ്.
വിജയ് ബാബു വിഷയത്തില് അന്വേഷണം നടത്തുകയും റിപ്പോര്ട്ട് സമര്പ്പിക്കുകയും ചെയ്തിരുന്നെങ്കിലും അമ്മയുടെ എക്സിക്യുട്ടിവ് മീറ്റിംഗില് റിപ്പോര്ട്ടിന്മേല് നടപടിയെടുത്തിരുന്നില്ല. ഇതാണ് ഐസിസിയില് നിന്നുള്ള രാജിക്ക് കാരണം. റിപ്പോര്ട്ടിന്മേല് നടപടിയെടുക്കാതെ വിജയ് ബാബുവിന്റെ കത്ത് അമ്മ സ്വീകരിക്കുകയും, നടന് തത്ക്കാലത്തേക്ക് അമ്മയില് നിന്ന് മാറി നില്ക്കുകയുമായിരുന്നു.
ഇന്നലെ ശ്വേതാ മേനോന് ഈ വിഷയത്തില് മോഹന്ലാലിന് ഒരു ശബ്ദ സന്ദേശം അയച്ചിരുന്നു. എന്നാല് ഇതില് താരത്തില് നിന്നും യാതൊരു മറുപടിയും ലഭിച്ചില്ല. ഒപ്പം വിജയ് ബാബു വിഷയത്തിലെ ഇടവേള ബാബുവിന്റെ നിലപാടും ശ്വേതാ മേനോന്റെ രാജിയ്ക്ക് കാരണമായിട്ടുണ്ട്.
തനിക്ക് മലയാളം വായിക്കുവാന് അറിയില്ല. ആ സാഹചര്യത്തില് തന്നെ തെറ്റിദ്ധരിപ്പിക്കും വിധമാണ് അമ്മ പത്രക്കുറിപ്പ് പുറത്തിറക്കിയത്. വിജയ് ബാബുവിനെതിരെ നടപടി വേണമെന്ന് ഐസി കമ്മിറ്റി അറിയിച്ചിരുന്നു. എന്നാല് അമ്മയുടെ പത്രക്കുറിപ്പില് അത് രേഖപ്പെടുത്തിയിട്ടില്ല. ഐസിസിയുടെ ആവശ്യങ്ങളും ചേര്ക്കണം. സംഘടനയുടെ വൈസ് പ്രസിഡന്റ് മണിയന്പിള്ള രാജു ഇന്നലെ റിപ്പോര്ട്ടര് ടിവിയ്ക്ക് നല്കിയ അഭിമുഖത്തില് നടത്തിയ പ്രസ്താവന തിരുത്തണം എന്നും ശ്വേതാ മേനോന് രാജിക്കത്തില് പറയുന്നു.
കഴിഞ്ഞ ദിവസം നടി മാല പാര്വതിയും വിഷയത്തില് രാജി നല്കിയിരുന്നു. കമ്മിറ്റി അംഗമെന്നത് വലിയ ഉത്തരവാദിത്തമാണ്. എന്നാല് തന്റെ മനസാക്ഷിക്ക് അനുസൃതമായി ഉത്തരവാദിത്തങ്ങള് നിറവേറ്റാന് കഴിയുമോ എന്ന കാര്യത്തില് സംശയമുണ്ട് എന്നും അതിനാലാണ് രാജി സമര്പ്പിക്കുന്നത് എന്നും മാല പാര്വതി രാജിയില് പറഞ്ഞു. ആഭ്യന്തര പരാതി പരിഹാര കമ്മിറ്റിയിയുടെ ഭാഗമാകാന് കഴിഞ്ഞതില് ഏറെ സന്തോഷമുണ്ട്. ഒരു ആഭ്യന്തര പരാതി കമ്മിറ്റി രൂപീകരിക്കുന്നതിലൂടെ കൃത്യമായ നിയമം പാലിക്കാനും സ്ത്രീകളില് ആത്മവിശ്വാസം ഉണ്ടാക്കി എടുക്കാനും സാധിച്ചു. ഒരു പരാതി പരിഹാര സമിതി എന്ന രീതിയില് മാത്രമല്ല, സ്ത്രീകള്ക്ക് നേരെയുള്ള പീഡനം തടയുന്നതിനുള്ള നയങ്ങള് നടപ്പിലാക്കുന്നതിനു വേണ്ടിയും കൂടെയാണ് സമിതി എന്നും മാല പാര്വതി അറിയിച്ചു.
