പെരുമ്പാവൂര്‍ : അശമന്നൂര്‍ പഞ്ചായത്തില്‍ ഇനി മുതല്‍ ആംബുലന്‍സ്, മൊബൈല്‍ ഫ്രീസര്‍, ക്രിമിറ്റോറിയം സേവനങ്ങള്‍ സൗജന്യമായി ലഭിക്കും. അശമന്നൂര്‍ പഞ്ചായത്തിലേക്ക് സൗജന്യ സേവനത്തിനായി എം.എല്‍.എ ഫണ്ടില്‍ നിന്ന് അനുവദിച്ച ആംബുലന്‍സിന്റെയും പഞ്ചായത്തിന്റെ ഫണ്ട് ഉപയോഗിച്ച് വാങ്ങിയ ക്രിമിറ്റോറിയത്തിന്റേയും മൊബൈല്‍ ഫ്രീസറിന്റേയും ഉദ്ഘാടനം അഡ്വ. എല്‍ദോസ് കുന്നപ്പിള്ളി എം.എല്‍.എ നിര്‍വഹിച്ചു.
സംസ്ഥാന ചരിത്രത്തില്‍ ആദ്യമായി ആരംഭിച്ച ഈ പദ്ധതി എല്‍ദോസ് കുന്നപ്പിള്ളി എം.എല്‍.എയുടെ കഴിഞ്ഞ വര്‍ഷത്തെ പ്രത്യേക വികസന ഫണ്ടും പഞ്ചായത്ത് ഫണ്ടും കൂടി യോജിപ്പിച്ചാണ് പദ്ധതി നടപ്പിലാക്കുന്നത്. എം.എല്‍.എ ഫണ്ടില്‍ നിന്നാണ് ആംബുലന്‍സ് അനുവദിച്ചത്. പദ്ധതിയുടെ തുടര്‍ ചെലവുകള്‍ അശമന്നൂര്‍ ഗ്രാമപഞ്ചായത്ത് വഹിക്കും. സൗജന്യ ആംബുലന്‍സ്, മൊബൈല്‍ ഫ്രീസര്‍, ക്രിമിറ്റോറിയം സൗജന്യ സേവനങ്ങള്‍ നടപ്പാക്കുന്ന കേരളത്തിലെ ആദ്യത്തെ പഞ്ചായത്തുകളില്‍ ഒന്നായി അശമന്നൂര്‍ പഞ്ചായത്ത് മാറുകയാണ്.
അശമന്നൂര്‍ ഗ്രാമപഞ്ചായത്ത് പ്രസിഡന്റ് എന്‍.എം സലിം അദ്ധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്റ് ബിന്ദു ഗോപാലകൃഷ്ണന്‍, വൈസ് പ്രസിഡന്റ് മനോജ് മൂത്തേടന്‍, ഗ്രാമപഞ്ചായത്ത് വൈസ് പ്രസിഡന്റ് ബിന്ദു നാരായണന്‍, ബ്ലോക്ക് പഞ്ചായത്ത് മെംബര്‍മാരായ കെ.പി വര്‍ഗീസ്, പ്രീത സുകു, സ്ഥിരം സമിതി അധ്യക്ഷരായ ഹണിത്ത് ബേബി, അഡ്വ. ചിത്ര ചന്ദ്രന്‍, ഗ്രാമപഞ്ചായത്ത് മെംബര്‍മാരായ അമ്പിളി രാജന്‍, എന്‍.കെ ശിവന്‍, ബിന്ദു ബെസ്സി, പഞ്ചായത്ത് സെക്രട്ടറി കെ. ഉദയ, മെഡിക്കല്‍ ഓഫീസര്‍ ഡോ. ബിജു വര്‍ഗീസ്, ഹോമിയോ ഓഫിസര്‍ ഡോ. ജീവന്‍ എന്നിവര്‍ സംസാരിച്ചു.
