രാജ്യത്തെ പ്രമുഖ കാര് നിര്മ്മാതാക്കളായ മാരുതി സുസുക്കിക്ക് പുതിയൊരു നേട്ടം കൂടി. ഇന്ത്യയില് 40 ലക്ഷം യൂണിറ്റ് വില്പ്പന പൂര്ത്തിയാക്കിയ ഒരേയൊരു കാറായി മാറിയിരിക്കുകയാണ് മാരുതി ആള്ട്ടോ. സാധാരണക്കാര്ക്ക് താങ്ങാവുന്ന വില, മികച്ച രൂപഭാവം, സുരക്ഷ, മറ്റു സവിശേഷതകള് എന്നിവയിലേക്കുള്ള അപ്ഗ്രേഡുകളിലേക്ക് ഡ്രൈവ് ചെയ്യാന് സൗകര്യപ്രദവും മാരുതി സുസുക്കിയുടെ വില്പ്പനാനന്തര പിന്തുണയും ആള്ട്ടോയുടെ ജനപ്രീതി കൂട്ടി. ഈ ഘടകങ്ങള് മികച്ച പുനര്-വില്പ്പന മൂല്യവും കാറിന് ലഭിക്കുന്നുവെന്നതും ഉപഭോക്താക്കളെ ആകര്ഷിക്കുന്നു.
‘തുടര്ച്ചയായ പതിനാറാം വര്ഷവും ഇന്ത്യയില് ഒന്നാം നമ്പര് വില്പ്പനയുള്ള കാറായി മാരുതി ആള്ട്ടോ റാങ്ക് ചെയ്യപ്പെട്ടിരിക്കുകയാണ്. 40 ലക്ഷം മൊത്ത വില്പ്പനയെന്ന മറ്റൊരു ശ്രദ്ധേയ നാഴികക്കല്ലും ആള്ട്ടോ പിന്നിട്ടതില് കമ്പനി അഭിമാനം കൊള്ളുന്നു,’ മാരുതി സുസുക്കിയിലെ മാര്ക്കറ്റിംഗ് ആന്ഡ് സെയില്സ് എക്സിക്യൂട്ടിവ് ഡയറക്ടര് ശശാങ്ക് ശ്രീവാസ്തവ വ്യക്തമാക്കി. ഇന്ത്യയിലെ മറ്റൊരു കാറും നേടാത്ത വില്പ്പന റെക്കോര്ഡാണിതെന്നും അദ്ദേഹം കൂട്ടിച്ചേര്ത്തു.
2004 -ലാണ് ഇന്ത്യയില് ഏറ്റവുമധികം വില്ക്കപ്പെടുന്ന കാറെന്ന ബഹുമതി ആദ്യമായി ആള്ട്ടോയ്ക്ക് ലഭിക്കുന്നത്. വിപണിയിലെത്തി നാല് വര്ഷത്തിന് ശേഷം ഈ ബഹുമതി നേടിയ ആള്ട്ടോയ്ക്ക് പിന്നീടൊരിക്കലും ഈ കിരീടം കൈവിടേണ്ടിവന്നിട്ടില്ല. 2019 നവംബറില് 38 ലക്ഷം യൂണിറ്റ് വില്പ്പനയെന്ന നേട്ടം സ്വന്തമാക്കിയ ഇന്ത്യയിലെ ഏക കാറായും മാരുതി ആള്ട്ടോ മാറി. റെനോ ക്വിഡ് പോലെ ശക്തമായ എതിരാളികള് ആള്ട്ടോയ്ക്ക് മുന്നിലെത്തിയെങ്കിലും ആള്ട്ടോയുടെ ഒന്നാം സ്ഥാനം സ്വന്തമാക്കാന് മറ്റൊരു കാറിനും ഇതുവരെ സാധിച്ചിട്ടില്ല.