തിരുവനന്തപുരം: വിഴിഞ്ഞം തുറമുഖത്തേക്ക് ലോഡ് കൊണ്ടുവന്ന ടിപ്പറില്‍നിന്ന് കല്ല് തെറിച്ചുവീണ് ഉണ്ടായ അപകടത്തില്‍ പരിക്കേറ്റ യുവാവ് മരിച്ചു.
മുക്കോല സ്വദേശി അനന്തു ആണ് മരിച്ചത്. നിംസ് ആശുപത്രിയില്‍ ചികിത്സയിലിരിക്കെയാണ് മരണം.
നിംസ് കോളജിലെ നാലാം വര്‍ഷ ബിഡിഎസ് വിദ്യാര്‍ഥിയാണ് അനന്തു. രാവിലെ എട്ടരയോടെ വിഴിഞ്ഞം മുക്കോലിയിലാണ് അപകടമുണ്ടായത്.
ലോഡുമായി വന്ന ടിപ്പറിന് പിന്നിലായി സ്കൂട്ടറില്‍ സഞ്ചരിക്കുകയായിരുന്നു അനന്തു. ഇതിനിടെ ടിപ്പറില്‍നിന്ന് ഇയാളുടെ ദേഹത്തേക്ക് കല്ല് തെറിച്ച് വീണ് ഗുരുതരമായി പരിക്കേല്‍ക്കുകയായിരുന്നു.
അതേസമയം സംഭവത്തില്‍ പ്രതിഷേധിച്ച്‌ വിഴിഞ്ഞം തുറമുഖ കവാടത്തില്‍ നാട്ടുകാര്‍ പ്രതിഷേധിച്ചിരുന്നു. അപകടമുണ്ടാക്കിയ ടിപ്പറില്‍ അമിത ലോഡ് ഉണ്ടായിരുന്നെന്നാണ് ആരോപണം. തുറമുഖത്തേക്ക് ലോഡുമായി വരുന്ന ടിപ്പറുകള്‍ നിരന്തരം അപകടമുണ്ടാക്കുകയാണെന്നും നാട്ടുകാര്‍ ആരോപിച്ചു.
