ആലപ്പുഴ: ചേര്ത്തല – അരൂക്കുറ്റി റോഡില് മാക്കേക്കവല ജപ്പാന് ശുദ്ധജല പ്ലാന്റിനു സമീപം കാറുകള് തമ്മില് കൂട്ടിയിടിച്ച് ഒരാള് മരിച്ചു. ഹരിപ്പാട്ടെ തുലാം പറമ്പ് പുന്നൂര് മഠത്തില് കളത്തില് ശങ്കരനാരായണ പണിക്കരുടെ മകന് ശ്രീജിത്ത്(36) ആണ് മരിച്ചത്. ഒപ്പമുണ്ടായിരുന്ന ശ്രീജിത്തിന്റെ അമ്മ ശ്യാമളയെ ഗുരുതര പരുക്കോടെ ലേക്ഷോര് ആശുപത്രിയില് പ്രവേശിപ്പിച്ചു. ഇദ്ദേഹത്തിന്റെ ഭാര്യക്കും കുട്ടിക്കും പരുക്കേറ്റിട്ടുണ്ട്. അപകടത്തില്പ്പെട്ട രണ്ടാമത്തെ കാറിലുണ്ടായിരുന്ന യാത്രികനും പരുക്കേറ്റു.
ഗുരുവായൂര് ക്ഷേത്ര ദര്ശനം കഴിഞ്ഞ് ശ്രീജിത്തും കുടുംബവും വീട്ടിലേക്കു മടങ്ങിവരുന്നതിനിടയിലാണ് അപകടം സംഭവിച്ചത്. കാറില് ശ്രീജിത്തിന്റെ ഭാര്യ അഭിജ, മകള് ശ്രേഷ്ഠ (ഒരു വയസ്), അമ്മ ശ്യാമള, അഭിജയുടെ അമ്മ വത്സലാ കുമാരി എന്നിവരാണ് ഉണ്ടായിരുന്നത്. എറണാകുളത്ത് സ്വകാര്യ കമ്പനിയില് എന്ജിനീയറായ ശ്രീജിത്തിന് ഇന്നു ഡ്യൂട്ടിയില് പ്രവേശിക്കുന്നതിനു വേണ്ടിയാണു പുലര്ച്ചെ രണ്ടുമണിയോടെ ഗുരുവായൂരില്നിന്ന് യാത്ര പുറപ്പെട്ടത്.
