തിരുവനന്തപുരം: നാളെ ഹര്ത്താലിനിടെ അക്രമങ്ങള് തടയാന് കര്ശനനടപടികള് സ്വീകരിക്കണമെന്ന് ഡിജിപി ലോക്നാഥ് ബഹ്റ ജില്ലാ പൊലീസ് മേധാവികള്ക്ക് നിര്ദേശം നല്കി. ഏതെങ്കിലും വിധത്തിലുളള അക്രമത്തില് ഏര്പ്പെടുകയോ സഞ്ചാര സ്വാതന്ത്ര്യം തടയുകയോ ചെയ്യുന്ന ഹര്ത്താല് അനുകൂലികള്ക്കെതിരെ കര്ശന നടപടി സ്വീകരിക്കുമെന്നും അദ്ദേഹം വ്യക്തമാക്കി. പൊതുമുതല് നശിപ്പിക്കുന്നവരുടെ കൈയ്യില് നിന്ന് നഷ്ടത്തിന് തുല്യമായ തുക ഈടാക്കാന് നിയമ നടപടി സ്വീകരിക്കും. ഇവരുടെ ബാങ്ക് അക്കൗണ്ടുകളില് നിന്നോ, സ്വത്തു വകകളില് നിന്നോ നഷ്ടം ഈടാക്കാനാണ് നടപടി സ്വീകരിക്കുക.
അക്രമത്തിന് മുതിരുകയോ നിര്ബന്ധമായും കടകളും സ്ഥാപനങ്ങളും അടപ്പിക്കാന് ശ്രമിക്കുകയോ ചെയ്യുന്നവരെ ഉടനടി അറസ്റ്റ് ചെയ്യുമെന്ന് സംസ്ഥാന പോലീസ് മേധാവി വ്യക്തമാക്കി. കടകള് തുറന്നാല് അവയ്ക്ക് ആവശ്യമായ സംരക്ഷണം നല്കും. ബലം പ്രയോഗിച്ച് കടകള് അടപ്പിക്കാന് ശ്രമിക്കുന്നവര്ക്കെതിരെ കര്ശന നടപടി സ്വീകരിക്കാനും നിര്ദ്ദേശിച്ചിട്ടുണ്ട്. അക്രമത്തിന് മുതിരുന്നവര്ക്കെതിരെ കേസ്സ് രജിസ്റ്റര് ചെയ്ത് നടപടി സ്വീകരിക്കണമെന്നും നിര്ദ്ദേശം നല്കി.
