തദ്ദേശ തിരഞ്ഞെടുപ്പില്‍ ഗര്‍ഭവും സ്വര്‍ണവുമല്ല ചര്‍ച്ചാ വിഷയമെന്ന് കേന്ദ്രമന്ത്രി സുരേഷ് ഗോപി. വികസന വിഷയങ്ങള്‍ ആയിരിക്കും തെരഞ്ഞെടുപ്പില്‍ ബിജെപി ഉയര്‍ത്തിക്കാട്ടുകയെന്നും സുരേഷ് ഗോപി പറഞ്ഞു.
ആരെയും ഒരുതരത്തിലും പ്രീണിപ്പിക്കേണ്ടെന്നും പ്രീണനമാണ് ജനങ്ങള്‍ ഏറ്റവും വലിയ അഴിമതിയായി കാണുന്നതെന്നും സുരേഷ്‌ഗോപി പറഞ്ഞു. സംഗീത സംവിധായകന്‍ പി.എസ്. വിദ്യാധരന്‍, ശരത്കൃഷ്ണന്‍, ഗീതാമ്മ, സദാനന്ദന്‍, ഡോ. വര്‍ഗീസ് ജെയിംസ്, ഡോ. വിജയകുമാര്‍, അഡ്വ. ഈശ്വരന്‍ എന്നിവര്‍ വികസനരേഖ ഏറ്റുവാങ്ങി. വികസനരേഖയുടെ വീഡിയോ ബിഡിജെഎസ് സംസ്ഥാന പ്രസിഡന്റ് തുഷാര്‍ വെള്ളാപ്പള്ളി പ്രകാശനം ചെയ്തു. ബിജെപി സിറ്റി ജില്ലാ പ്രസിഡന്റ് ജസ്റ്റിന്‍ ജേക്കബ് അധ്യക്ഷത വഹിച്ചു.
വോട്ടിംഗ് പ്രക്രിയയിലെ ഏറ്റവും ശുദ്ധീകരണ ശക്തിയാണ് എസ്‌ഐആറെന്നും സുരേഷ് ഗോപി പറഞ്ഞു. അത് എന്ത് വില കൊടുത്തും നടപ്പിലാക്കിയിരിക്കണമെന്നും നമുക്ക് കള്ളക്കമ്പുകള്‍ ആരും വോട്ട് ചെയ്യേണ്ടെന്നും സുരേഷ് ഗോപി പറഞ്ഞു. യഥാര്‍ഥ വോട്ട് ചോരി ആര് നടത്തി എന്നുള്ളത് വ്യക്തമാകും. ബംഗാളിലും വ്യക്തമാകും. ഇതൊന്നും പക്ഷേ നമ്മുടെ ഇപ്പോഴത്തെ ചര്‍ച്ചാ വിഷയമാകരുത്. വികസനം മാത്രമായിരിക്കണം ചര്‍ച്ച. ജനങ്ങള്‍ ഉയര്‍ത്തിക്കാട്ടുന്ന ആഗ്രഹങ്ങള്‍ ആവശ്യങ്ങള്‍ എന്നിവ സാധ്യമാക്കിക്കൊടുക്കാന്‍ നമുക്ക് ഉത്തരവാദിത്തമുണ്ട്. ആ ഉത്തരവാദിത്തം നമ്മളെ ഏല്‍പ്പിച്ചാല്‍ ഉറപ്പായിട്ടും നിര്‍വഹിക്കും – അദ്ദേഹം പറഞ്ഞു.
