തിരുവനന്തപുരം: വ്യക്തികളെ ചോദ്യം ചെയ്യാനും സാക്ഷി പറയാനും വിളിപ്പിക്കുന്നതിനും നോട്ടീസ് നല്കുന്നത് നിര്ബന്ധമാക്കണമെന്ന് സംസ്ഥാന പൊലീസ് മേധാവിയുടെ നിര്ദേശം. സ്റ്റേഷനിലേക്ക് വിളിപ്പിക്കുന്നവരുടെ പൂര്ണ സുരക്ഷ അന്വേഷണ ഉദ്യോഗസ്ഥന്റെ ഉത്തരവാദിത്തമാണെന്നും നിര്ദ്ദേശത്തിലുണ്ട്.
സുപ്രീംകോടതിയുടെ നിര്ദേശ പ്രകാരമാണ് പത്തുവര്ഷം മുമ്പ് നിലവില് വന്ന മാര്ഗനിര്ദ്ദേശങ്ങള് പുതുക്കി സര്ക്കുലര് ഇറക്കിയത്. ചോദ്യം ചെയ്യലിന് ഹാജരാകുന്നവര് നോട്ടീസ് കൈപറ്റി രസീത് വാങ്ങണം. ക്രിമിനല് നടപടി പ്രകാരം കോടതി അനുമതിയില്ലാതെ വ്യക്തികളെ അറസ്റ്റ് ചെയ്യാന് പൊലീസിന് അധികാരമുണ്ട്. ഈ നടപടി ക്രമങ്ങള് സുപ്രീം കോടതി നിര്ദേശ പ്രകാരം 2011 ല് പൊലീസ് പുറപ്പെടുവിച്ചിരുന്നു.
