ഇടുക്കി: പുളിയന്മലയിലെ ജനവാസമേഖലയില്‍ പുലിയിറങ്ങി. കഴിഞ്ഞ ദിവസം ഏലത്തോട്ടത്തിലാണ് പുലിയുടേതെന്ന് സംശയിക്കുന്ന കാല്‍പ്പാടുകള്‍ കണ്ടത്. തുടര്‍ന്ന് വനം വകുപ്പ് ഉദ്യോഗസ്ഥരെത്തി പരിശോധന നടത്തി കാല്‍പ്പാട് പുലിയുടേതാമെന്ന് സ്ഥിരീകരിക്കുകയായിരുന്നു. സംഭവത്തിന് പിന്നാലെ പ്രദേശത്ത് വനം വകുപ്പ് നിരീക്ഷണം ശക്തമാക്കിയിരിക്കുകയാണ്. ക്യാമറകള്‍ സ്ഥാപിച്ച് നിരീക്ഷണം ശക്തമാക്കാനാണ് വനം വകുപ്പിന്റെ നീക്കം.
കഴിഞ്ഞ ദിവസമാണ് പുളിയന്മല എന്‍എംആര്‍ എസ്റ്റേറ്റിലെ തൊഴിലാളികള്‍ പുലിയുടേതെന്ന് സംശയിക്കുന്ന കാല്‍പ്പാടുകള്‍ പ്രദേശത്ത് കണ്ടത്. നാട്ടുകാര്‍ വിവരമറിയിച്ചതിനെ തുടര്‍ന്ന് വണ്ടന്‍മേട് പോലീസും വനപാലകരും സംഭവ സ്ഥലത്തെത്തി. തുടര്‍ന്ന് നടത്തിയ പരിശോധനയില്‍ കാല്‍പ്പാടുകള്‍ പുലിയുടേതാണെന്ന് സ്ഥിരീകരിക്കുകയായിരുന്നു.
നിരവധി തവണ പുലിയുടെ കാല്‍പ്പാടുകള്‍ പരിസര പ്രദേശങ്ങളിലായി കണ്ടതോടെ പ്രദേശവാസികള്‍ ആശങ്കയിലാണ്. വന്യജീവി ശല്യം തടയുന്നതിനായി ഫലപ്രദമായ നടപടികള്‍ സ്വീകരിക്കണമെന്നാണ് നാട്ടുകാരുടെ ആവശ്യം.
