എറണാകുളം: കുടുംബശ്രീ സിഡിഎസുകളുടെ പ്രവര്‍ത്തനങ്ങള്‍ക്ക് മറ്റൊരു അംഗീകാരം കൂടി. സംസ്ഥാനത്തെ സിഡിഎസ് കാര്യാലയങ്ങളുടെ പ്രവര്‍ത്തനങ്ങള്‍ കൂടുതല്‍ കാര്യക്ഷമവും നിലവാരമുള്ളതുമാക്കുന്നതിനായി ആരംഭിച്ച ഐഎസ്ഒ സര്‍ട്ടിഫിക്കേഷന്‍ പ്രവര്‍ത്തനത്തിന്റെ ഭാഗമായി എറണാകുളം ജില്ലയിലെ 61 ഗ്രാമ സി.ഡി.എസ്. ഓഫീസുകള്‍ക്ക് ഐഎസ്ഒ 9001:2015 സര്‍ട്ടിഫിക്കേഷന്‍ ലഭിച്ചു.
കുടുംബശ്രീയുടെ ത്രിതല സംഘടനാ സംവിധാനത്തിലെ ഏറ്റവും മേല്‍ തട്ടായ സി.ഡി.എസ്. ഓഫീസുകളെ അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിനുള്ള ശ്രമങ്ങളുടെ ഭാഗമായാണ് സര്‍ട്ടിഫിക്കേഷന്‍ നടപ്പിലാക്കിയത്. ജില്ലയില്‍ ആദ്യം മാറാടിയും ആവോലിയുമാണ് സര്‍ട്ടിഫിക്കേഷന്‍ ലഭിച്ചത്. മൂവാറ്റുപുഴ, പാറക്കടവ്, പാമ്പാക്കുട ബ്ലോക്കുകളിലെ മുഴുവന്‍ ഗ്രാമ സി.ഡി.എസ്. ഓഫീസുകള്‍ക്കും സര്‍ട്ടിഫിക്കേഷന്‍ ലഭിച്ചു.
സി.ഡി.എസ്. കാര്യാലയങ്ങളെ ഐഎസ്ഒ നിലവാരത്തിലേയ്ക്ക് ഉയര്‍ത്തുന്നതിനായി ക്വാളിറ്റി മാനേജ്‌മെന്റ് സിസ്റ്റം (QMS) നടപ്പിലാക്കിയിരുന്നു. ജനങ്ങള്‍ക്ക് നല്‍കുന്ന സേവനങ്ങള്‍ സമ്പൂര്‍ണ്ണ ഗുണമേന്മയോടെ, സമയബന്ധിതമായും, സമത്വം ഉറപ്പുവരുത്തിയും ലഭ്യമാക്കുക എന്നതാണ് QMS-ിന്റെ പ്രധാന ലക്ഷ്യം. ഓഫീസ് സംവിധാനങ്ങളും ഭരണസംവിധാനങ്ങളും ടോട്ടല്‍ ക്വാളിറ്റി മാനേജ്‌മെന്റ് (TQM) തത്വങ്ങള്‍ പാലിച്ചാണ് നടത്തപ്പെടുന്നത്.
സ്ത്രീകള്‍, ഭിന്നശേഷിയുള്ളവര്‍, കുട്ടികള്‍, വയോജനങ്ങള്‍, പിന്നാക്ക വിഭാഗങ്ങള്‍ എന്നിവര്‍ക്കും സേവനങ്ങളില്‍ സമത്വം ഉറപ്പുവരുത്തുന്ന രീതിയില്‍ സംവിധാനങ്ങള്‍ ഏര്‍പ്പെടുത്തുക, സര്‍ക്കാര്‍ അംഗീകരിച്ച ബൈലോ പ്രകാരമുള്ള പ്രവര്‍ത്തനങ്ങള്‍ സമയബന്ധിതമായി പൂര്‍ത്തിയാക്കുക, സംവിധാനങ്ങളുടെ ഗുണനിലവാരം നിലനിര്‍ത്തുക തുടങ്ങിയ ലക്ഷ്യങ്ങള്‍ മുന്നോട്ട് വെച്ചുകൊണ്ടാണ് ഐഎസ്ഒ സര്‍ട്ടിഫിക്കേഷന്‍ ജില്ലയില്‍ നടപ്പാക്കിയത്.
ജില്ലയിലെ ഐഎസ്ഒ സര്‍ട്ടിഫിക്കേഷന്‍ ലഭിച്ച സിഡിഎസുകള്‍:
കരുമാലൂര്‍, കടുങ്ങല്ലൂര്‍, ആലങ്ങാട്, അയ്യമ്പുഴ, കാലടി, മഞ്ഞപ്ര, മലയാറ്റൂര്‍, മൂക്കന്നൂര്‍, കാഞ്ഞൂര്‍, കറുകുറ്റി, ചേരാനല്ലൂര്‍, കൂവപ്പടി, രായമംഗലം, മുടക്കുഴ, കുമ്പളം, കുമ്പളങ്ങി, നെടുമ്പാശ്ശേരി, ചെങ്ങമനാട്, കുന്നുകര, ശ്രീമൂലനഗരം, പുത്തന്‍വേലിക്കര, പാറക്കടവ്, വടക്കേക്കര, ഏഴിക്കര, കോട്ടുവളളി, എടത്തല, വാഴക്കുളം, കിഴക്കമ്പലം, വെങ്ങോല, കുഴുപ്പിളളി, ഞാറയ്ക്കല്‍, പളളിപ്പുറം, കവളങ്ങാട്, കീരംപാറ, കോട്ടപ്പടി, പൈങ്ങോട്ടൂര്‍, പല്ലാരിമംഗലം, പിണ്ടിമന, വാരപ്പെട്ടി, ആമ്പല്ലൂര്‍, എടയ്ക്കാട്ടുവയല്‍, മണീട്, മുളന്തുരുത്തി, ആരക്കുഴ, ആയവന, കല്ലൂര്‍ക്കാട്, മഞ്ഞളളൂര്‍, മാറാടി, പായിപ്ര, വാളകം, ആവോലി, പാലക്കുഴ, പാമ്പാക്കുട,രാമമംഗലം, തിരുമാറാടി, ഇലഞ്ഞി, ഐക്കരനാട്, കുന്നത്തുനാട്, മഴുവന്നൂര്‍, പൂതൃക്ക, വടവുകോട്-പുത്തന്‍കുരിശ്. എറണാകുളം ജില്ലയിലെ 61 സി.ഡി.എസ്. ഓഫീസുകള്‍ക്ക് ഐഎസ്ഒ സര്‍ട്ടിഫിക്കറ്റ് ലഭിച്ചു
