കോഴിക്കോട് : തനിക്കെതിരെ പൊലീസിന്റെ ആസൂത്രിത ആക്രമണമെന്ന് പേരാമ്പ്രയില് ഉണ്ടായതെന്ന് ഷാഫി പറമ്പില് എം പി പറഞ്ഞു. സംഘര്ഷത്തിനിടെ തന്നെ മര്ദിച്ചത് വടകര കണ്ട്രോള് റൂം സിഐ അഭിലാഷ് ഡേവിഡ് ആണെന്നും ഷാഫി പറമ്പില് മാധ്യമങ്ങളോട് പറഞ്ഞു. മാഫിയ ബന്ധത്തിന്റെ പേരില് 2023 ജനുവരി 16ന് സസ്പെന്ഷനില് പോയ പൊലീസ് ഉദ്യോഗസ്ഥനാണ് അഭിലാഷ് ഡേവിഡ്. പിന്നാലെ ഇയാളെ പിരിച്ചു വിട്ടു എന്ന് വാര്ത്ത വന്നതാണെന്നും വഞ്ചിയൂര് സിപിഎം ഏരിയ കമ്മിറ്റി ഓഫീസിലെ നിത്യസന്ദര്ശകനാണ് ഇയാളെന്നും ഷാഫി പറഞ്ഞു.
പേരാമ്പ്രയില് ആക്രമണം ഉണ്ടായത് ശബരിമല വിഷയം മാറ്റാനാണ്. ആസൂത്രിതമായ അക്രമമാണ് പൊലീസ് നടത്തിയത്. പൊലീസിന്റെ കൈയില് ഇരുന്ന ഗ്രനേഡ് പൊട്ടിയാണ് തനിക്ക് പരിക്കുണ്ടായതെന്നും അദ്ദേഹം പറഞ്ഞു. പേരാമ്പ്രയില് സംഘര്ഷം ഒഴിവാക്കാനാണ് താന് ശ്രമിച്ചത്. അതിന്റെ ദൃശ്യങ്ങള് ഉണ്ട്. ഇത്ര വലിയ മര്ദനമേറ്റിട്ടും അവിടുന്നു ഓടി ആശുപത്രിയില് പോകാഞ്ഞത് പ്രവര്ത്തകരെ പിരിച്ചു വിടാന് വേണ്ടിയാണ്. അവിടെ പ്രശ്നങ്ങള് ഒഴിവാക്കാനാണ് ശ്രമിച്ചത്. മര്ദിച്ചില്ലെന്ന് പറഞ്ഞ എസ്പിക്ക് പോലും അത് മാറ്റിപ്പറയേണ്ടി വന്നു. എഐ ടൂള് ഉപയോഗിച്ച് ആളെ തിരിച്ചറിഞ്ഞു നടപടിയെടുക്കും എന്ന് പറഞ്ഞു. എന്നിട്ട് ഇതുവരെ ഒരു നടപടിയും ഉണ്ടായില്ല. സിപിഎം ഇടപെടലിനെ തുടര്ന്നാണ് എസ്പി അന്വേഷണം നിര്ത്തിയത്. ഇതുവരെ മൊഴി പോലും എടുത്തില്ല. റൂറല് എസ്പിയുടെ ബൈറ്റ് പുറത്തു വന്ന ശേഷം ഇടപെടല് ഉണ്ടായി. ഒരു ഉദ്യോഗസ്ഥന് തന്നെയാണ് രണ്ടു തവണ അടിച്ചത്. മൂന്നാമത് അടിച്ചപ്പോള് മറ്റൊരു ഉദ്യോഗസ്ഥന് തടഞ്ഞു. അടിക്കുന്ന സമയത്ത് ഒരു സംഘര്ഷമോ കല്ലേറോ ഉണ്ടായിട്ടില്ല. പൊലീസിന്റെ കൈയില് ഇരുന്ന ഗ്രനേഡ് പൊട്ടിയാണ് പരിക്കുണ്ടായത്. ഗ്രനേഡ് കൈയില് വെച്ച് ഒരു കൈയില് ലാത്തി കൊണ്ട് ഡിവൈഎസ്പി ഹരിപ്രസാദ് അടിക്കാന് ശ്രമിച്ചെന്നും ഷാഫി പറഞ്ഞു.