തൃശൂര്: കരുവന്നൂര് ബാങ്ക് തട്ടിപ്പ് കേസില് ഇ ഡിയുടെ റെയ്ഡിന് പിന്നാലെ എസി മൊയ്തീന് എംഎല്എയുടെ ബാങ്ക് അക്കൗണ്ട് മരവിപ്പിച്ചു.എ സി മൊയ്തീനുമായി അടുപ്പമുള്ള ആളുകളുടെയും അക്കൗണ്ടുകള് മരവിപ്പിച്ചു. കഴിഞ്ഞ ദിവസം ഇഡി റെയ്ഡ് നടത്തിയ ആളുകളുടെ അക്കൗണ്ടുകളാണ് മരവിപ്പിച്ചത്. 30 ലക്ഷം രൂപയുടെ എഫ്ഡി അക്കൗണ്ടാണ് മൊയ്തീന്റെ മരവിപ്പിച്ചത്.
കരുവന്നൂര് ബാങ്ക് തട്ടിപ്പ് കേസിലെ ക്രമക്കേടുകളുമായി ബന്ധപ്പെട്ട് 22 മണിക്കൂറാണ് ഇ ഡി എസി മൊയ്തീന് എംഎല്എയുടെ വീട് റെയ്ഡ് നടത്തിയത്. ഇന്ന് കോലഴി സ്വദേശി സതീഷിനോട് കൊച്ചി ഇ ഡി ഓഫീസില് ഹാജരാകാന് ആവശ്യപ്പെട്ടിരുന്നു. എ സി മൊയ്തീനുമായി അടുപ്പമുള്ള മൂന്ന് ആളുകളോടാണ് ഇന്ന് കൊച്ചി ഇ ഡി ഓഫീസില് ഹാജരാകാന് ആവശ്യപ്പെട്ടിരിക്കുന്നത്.
മുന് സഹകരണ വകുപ്പ് മന്ത്രിയും നിലവില് കുന്നംകുളം നിയോജക മണ്ഡലത്തിലെ എംഎല്എയുമാണ് എ സി മൊയ്തീന്. ബാങ്ക് തട്ടിപ്പില് മൊയ്തീന് പങ്കുണ്ടെന്ന് കണ്ടെത്തിയതോടെയാണ് ഇ ഡിയുടെ റെയ്ഡ്. 300 കോടിയുടെ ക്രമക്കേടാണ് കണ്ടെത്തിയിരിക്കുന്നത്. ക്രമ വിരുദ്ധമായി വായ്പ നല്കിയെന്നും ക്രമ വിരുദ്ധമായി ഇടപെടല് നടത്തിയെന്നുമാണ് കണ്ടെത്തല്.
കഴിഞ്ഞ ദിവസം റെയ്ഡ് ഇ ഡി റെയ്ഡ് നടത്തിയ ആളുകളുമായി എസി മൊയ്തീന് എംഎല്എ നിരന്തരം ഫോണില് ബന്ധപ്പെട്ടിരുന്നു എന്നുമാണ് ലഭിക്കുന്ന വിവരം.. എ സി മൊയ്തീന് അടക്കമുള്ളവര് ഇ ഡിയുടെ നിരീക്ഷണത്തിലായിരുന്നു. ചൊവ്വ രാവിലെ 7.30 നാണ് റെയ്ഡ് തുടങ്ങിയത്. എ സി മൊയ്തീന്റെ കുന്നംകുളത്തെ ഓഫീസിലും സമാന്തരമായി റെയ്ഡ് നടന്നിരുന്നു.
