ന്യൂഡല്ഹി: പുതിയ പാര്ലമെന്റ് മന്ദിരത്തിന്റെ ഉദ്ഘാടന ചടങ്ങ് ബഹിഷ്കരിക്കാനുള്ള പ്രതിപക്ഷ പാര്ട്ടികളുടെ നീക്കത്തെ വിമര്ശിച്ച് ഡി.പി.എ.പി പാര്ട്ടി അധ്യക്ഷന് ഗുലാം നബി ആസാദ്. റെക്കോര്ഡ് സമയത്തിനുള്ളില് പുതിയ പാര്ലമെന്റ് മന്ദിരം സ്ഥാപിച്ചതിന് വിമര്ശിക്കുകയല്ല, ബിജെപി സര്ക്കാരിനെ അഭിനന്ദിക്കുകയാണ് പ്രതിപക്ഷം ചെയ്യേണ്ടതെന്ന് ഗുലാം നബി ആസാദ് പറഞ്ഞു.
പുതിയ പാര്ലമെന്റ് മന്ദിരം അനിവാര്യമായിരുന്നു. അതിന്റെ ഉദ്ഘാടനം നിര്വഹിക്കുന്നത് പ്രധാനമന്ത്രിയാണോ രാഷ്ട്രപതിയാണോ എന്നത് വലിയ വിഷയമല്ല. ഉദ്ഘാടന ദിവസം ഡല്ഹിയില് ഉണ്ടായിരുന്നെങ്കില് ഉറപ്പായും ചടങ്ങില് പങ്കെടുക്കുമായിരുന്നു. എന്നാല് അന്ന് മറ്റൊരു പരിപാടിയുള്ളതിനാല് ചടങ്ങിനെത്താനാകില്ല. പ്രതിപക്ഷം ചടങ്ങ് ബഹിഷ്കരിക്കുന്നതിനെ ശക്തമായി എതിര്ക്കുന്നെന്നും ഗുലാം നബി പറഞ്ഞു.
‘ഗുലാം നബി ആസാദ് പറഞ്ഞത്
ഏകദേശം 30-35 വര്ഷങ്ങള്ക്ക് മുമ്പ് ഞാന് പാര്ലമെന്ററികാര്യ മന്ത്രിയായിരുന്നപ്പോള് പുതിയ പാര്ലമെന്റ് മന്ദിര നിര്മാണം ഞങ്ങള് സ്വപ്നം കണ്ടിരുന്നു. അന്നത്തെ പ്രധാനമന്ത്രി നരസിംഹ റാവുവും ശിവരാജ് പാട്ടീലും ഞാനും പദ്ധതിയെക്കുറിച്ച് ചര്ച്ചചെയ്യുകയും ഏകദേശ രൂപരേഖയുണ്ടാക്കുകയും ചെയ്തിരുന്നു. എന്നാല് പിന്നീട് ഞങ്ങള്ക്കത് ചെയ്യാന് സാധിച്ചില്ല. എന്നാല് ഇന്നതിന്റെ നിര്മാണം പൂര്ത്തിയായി. അത് നല്ലൊരു കാര്യമാണ്’, ആസാദ് പറഞ്ഞു. ഇത്ര ചെറിയ സമയത്തിനുള്ളില് പാര്ലമെന്റ് മന്ദിരത്തിന്റെ നിര്മാണം പൂര്ത്തിയാക്കിയത് അത്ര എളുപ്പമുള്ള കാര്യമല്ലെന്ന് പറഞ്ഞ ഗുലാം നബി, ഈ നേട്ടം കൈവരിച്ച കേന്ദ്രസര്ക്കാരിനെ അഭിനന്ദിക്കുകയും ചെയ്തു.