ഡല്ഹി : ഡല്ഹിയിലുടനീളമുള്ള നിരവധി മെട്രോ സ്റ്റേഷനുകളില് ചുവരുകളില് ഖാലിസ്ഥാന് അനുകൂല മുദ്രാവാക്യങ്ങള് എഴുതി വികൃതമാക്കിയതായി പോലീസ്. സെപ്റ്റംബര് 9-10 തീയതികളില് നടക്കാനിരിക്കുന്ന ജി20 ഉച്ചകോടിക്ക് മുന്നോടിയായാണ് ഈ സംഭവം നടന്നിരിക്കുന്നത്.
പഞ്ചാബി ബാഗ്, ശിവാജി പാര്ക്ക്, മാഡിപൂര്, പശ്ചിമ വിഹാര്, ഉദ്യോഗ് നഗര്, മഹാരാജ സൂരജ്മല് സ്റ്റേഡിയം എന്നിവയുള്പ്പെടെയുള്ള മെട്രോ സ്റ്റേഷനുകളുടെ ചുവരുകളിലാണ് ‘ഡല്ഹി ബനേഗാ ഖാലിസ്ഥാന്’, ‘ഖാലിസ്ഥാന് റെഫറണ്ടം സിന്ദാബാദ്’ തുടങ്ങിയ മുദ്രാവാക്യങ്ങള് കറുപ്പ് നിറത്തില് ഗ്രാഫിറ്റി ചെയ്തിരിക്കുന്നത്.
ശിവാജി പാര്ക്ക്, പഞ്ചാബി ബാഗ് എന്നിവയുള്പ്പെടെ ഒന്നിലധികം മെട്രോ സ്റ്റേഷനുകളില് നിരോധിത സംഘടനയായ സിഖ് ഫോര് ജസ്റ്റിസിന്റെ (എസ്എഫ്ജെ) പ്രവര്ത്തകരുടെ സാന്നിധ്യം ഉണ്ടായിരുന്നെന്നും ഇവരാണ് ഖാലിസ്ഥാന് അനുകൂല മുദ്രാവാക്യങ്ങള് എഴുതിയതെന്നും ഡല്ഹി പോലീസ് പറയുന്നു. നംഗ്ലോയിലെ സര്ക്കാര് സര്വോദയ ബാല വിദ്യാലയത്തിന്റെ ചുവരിലും ഇന്ത്യാ വിരുദ്ധ ചുവരെഴുത്തുകള് കണ്ടെത്തിയിട്ടുണ്ട്.
ഡല്ഹി പോലീസിന്റെ പ്രത്യേക സെല് വിവിധ സ്ഥലങ്ങളില് അന്വേഷണം ആരംഭിക്കുകയും ചെയ്തിട്ടുണ്ട്. മെട്രോ സ്റ്റേഷനുകളുടെ ചുവരുകളില് എഴുതിയിരിക്കുന്ന ചുവരെഴുത്തുകളെല്ലാം നീക്കം ചെയ്തതായി ഡിസിപി (മെട്രോ) അറിയിച്ചു. സിസിടിവി ദൃശ്യങ്ങള് പരിശോധിച്ച് എത്രയും വേഗം പ്രതികളെ പിടികൂടാനുളള ശ്രമത്തിലാണ് പോലീസ്.
സിഖ് ഫോര് ജസ്റ്റിസ്, (എസ്എഫ്ജെ) നിരവധി ഡല്ഹി മെട്രോ സ്റ്റേഷനുകളുടെ ചുവരുകളില് ഖാലിസ്ഥാന് അനുകൂല ചുവരെഴുത്തുകള് എഴുതി വികൃതമാക്കുന്നതിന്റെ ദൃശ്യങ്ങള് പുറത്തുവിട്ടതായും പോലീസ് പറഞ്ഞു. ഡല്ഹിയില് ജി20 ഉച്ചകോടി നടക്കുന്ന സെപ്തംബര് 10ന് കാനഡയിലെ സറേയില് ഹിതപരിശോധന നടത്തുമെന്ന് അതിന്റെ ഖാലിസ്ഥാന് തലവന് ഗുര്പത്വന്ത് സിംഗിന്റെ വീഡിയോയും പുറത്ത് വന്നിട്ടുണ്ട്.
