തിരുവനന്തപുരം: തിരുവനന്തപുരത്ത് നിന്നും കാണാതായ അധ്യാപിക അടക്കം മൂന്നു മലയാളികളെ അരുണാചല്പ്രദേശിലെ ഹോട്ടല് മുറിയില് മരിച്ച നിലയില് കണ്ടെത്തി. കോട്ടയം സ്വദേശികളായ ദമ്പതികളായ നവീന്, ഭാര്യ ദേവി ഇവരുടെ സുഹൃത്തായ അധ്യാപിക ആര്യ (29) എന്നിവരാണ് മരിച്ചത്. അരുണാചലിന്റെ തലസ്ഥാനമായ ഇറ്റാനഗറിലെ ഹോട്ടലിലാണ് മൃതദേഹങ്ങള് കണ്ടെത്തിയത്. മൂവരും ശരീരത്തില് വ്യത്യസ്തമായ മുറിവുകളുണ്ടാക്കിയെന്നാണ് വിവരം. മുറിവുകളില് നിന്ന് രക്തം വാര്ന്നാണ് മരണം സംഭവിച്ചത്.
ഇന്ന് രാവിലെയാണ് ഇറ്റാനഗര് പൊലീസ് മരണവിവരം ബന്ധുക്കളെയും കേരള പൊലീസിനെയും അറിയിച്ചത്. മരിച്ചവരുടെ മുറിയില് നിന്ന് ലഭിച്ച രേഖകള് പ്രകാരമാണ് ഇറ്റാനഗര് പൊലീസ് ആളുകളെ തിരിച്ചറിഞ്ഞത്. മാര്ച്ച് മാസം 27 നാണ് വിവാഹം നിശ്ചയിച്ചിരുന്ന ആര്യയെ തിരുവനന്തപുരത്ത് നിന്ന് കാണാതായത്. ഇത് സംബന്ധിച്ച് പിതാവ് വട്ടിയൂര്കാവ് പൊലിസില് പരാതി നല്കിയിരുന്നു.
തിരുവനന്തപുരത്തെ സ്വകാര്യ സ്കൂളില് അധ്യാപികയായിരുന്ന ആര്യ വീട്ടുകാരോടൊന്നും പറയാതെയാണ് ഇറങ്ങിപ്പോയത്. ആര്യയെ ഫോണില് ബന്ധപ്പെടാന് കഴിയാതെ വന്നതോടെ ബന്ധുക്കള് പൊലീസില് വിവരമറിയിക്കുകയായിരുന്നു. പൊലീസ് അന്വേഷണത്തില് ആര്യയുടെ സുഹൃത്തായ ദേവിയും ഭര്ത്താവ് നവീനും ഒപ്പമുണ്ടെന്ന് മനസിലായിരുന്നു. വിമാന മാര്ഗം മൂവരും ഗുവാഹത്തിയിലേക്ക് പോയതായി കണ്ടെത്തിയിരുന്നു. നവീനും ദേവിയും വിനോദയാത്ര പോകുന്നുവെന്ന് പറഞ്ഞാണ് വീട്ടില് നിന്ന് പോയത്. അതിനാല് ബന്ധുക്കള് അന്വേഷിച്ചിരുന്നില്ല.
ഇവരെക്കുറിച്ചുള്ള വിവരങ്ങള് കേരള പൊലീസ് അസം പൊലീസിന് കൈമാറി. ഇവര്ക്കായുള്ള അന്വേഷണം തുടരുന്നതിനിടെയാണ് മൂവരെയും മരിച്ച നിലയില് കണ്ടെത്തിയതായി ബന്ധുക്കള്ക്കും പൊലീസിനും വിവരം ലഭിച്ചത്. ആത്മഹത്യാക്കുറിപ്പും കണ്ടെത്തിയിരുന്നു. ‘സന്തോഷത്തോടെ ജീവിച്ചു, ഇനി ഞങ്ങള് പോകുന്നു’ എന്നായിരുന്നു കുറിപ്പിലുണ്ടായിരുന്നത്. ഇവര് മരണാനന്തര ജീവിതത്തെക്കുറിച്ച് ഗൂഗിളില് ഉള്പ്പെടെ തിരഞ്ഞതായി അന്വേഷണ ഘട്ടത്തില് പൊലീസ് കണ്ടെത്തിയിരുന്നു. ഫോണ് കേന്ദ്രീകരിച്ചുള്ള പരിശോധനയിലാണ് ഇക്കാര്യം കണ്ടെത്തിയത്. മൃതദേഹങ്ങള് ആശുപത്രിയിലേക്ക് മാറ്റി.