മുംബൈ: ബോളിവുഡ് താരം ഷാരൂഖ് ഖാന് വധഭീഷണി, വൈ പ്ലസ് കാറ്റഗറി സുരക്ഷ ഏര്‍പ്പെടുത്തി മഹാരാഷ്ട്ര സര്‍ക്കാര്‍. അധിക സുരക്ഷയുടെ ചെലവ് ഷാരൂഖ് വഹിക്കും. സംസ്ഥാനത്തെ എല്ലാ പൊലീസ് കമ്മീഷണറേറ്റ്‌സിനും, ജില്ലാ പൊലീസ്, സ്പെഷ്യല്‍ പ്രൊട്ടക്ഷന്‍ യൂണിറ്റുകള്‍ക്കും (എസ്പിയു) നടന് വൈ പ്ലസ് കാറ്റഗറി സുരക്ഷ നല്‍കാന്‍ മഹാരാഷ്ട്ര സ്റ്റേറ്റ് ഇന്റലിജന്‍സ് ഡിപ്പാര്‍ട്ട്മെന്റ് (എസ്ഐഡി) കഴിഞ്ഞ ദിവസം നിര്‍ദേശം നല്‍കി.
ഈ വര്‍ഷം ആദ്യം പുറത്തിറങ്ങിയ ഷാരൂഖിന്റെ പഠാന്‍ എന്ന ചിത്രത്തിലെ ബേഷാരം രംഗ് എന്ന ഗാനത്തെച്ചൊല്ലിയുണ്ടായ വിവാദത്തിന് പിന്നാലെയാണ്, അയോധ്യ ആസ്ഥാനമായുള്ള ദര്‍ശകന്‍ പരംഹന്‍സ് ആചാര്യ നടന് വധഭീഷണി മുഴക്കിയത്. ഓഗസ്റ്റില്‍, ഓണ്‍ലൈന്‍ ഗെയിമിംഗ് ആപ്പുകളെ സെലിബ്രിറ്റികള്‍ പ്രോത്സാഹിപ്പിക്കുന്നതിനെതിരെയുള്ള പ്രതിഷേധത്തത്തില്‍ ഷാരൂഖിന്റെ വീടിന് പുറത്ത് സുരക്ഷ ശക്തമാക്കിയിരുന്നു. 2010ല്‍ പുറത്തിറങ്ങിയ ‘മൈ നെയിം ഈസ് ഖാന്’ എന്ന സിനിമയുടെ റിലീസിന് പിന്നാലെ ഭീഷണിയെ തുടര്‍ന്നാണ് ഇതിന് മുന്‍പ് അദ്ദേഹത്തിന്റെ സുരക്ഷ വര്‍ധിപ്പിച്ചത്.
അടുത്തിടെ ചേര്‍ന്ന ഉന്നതാധികാര സമിതി യോഗത്തില്‍ താരത്തിനെതിരായ ഭീഷണിയും സുരക്ഷയും അവലോകനം ചെയ്ത ശേഷമാണ് തീരുമാനമെടുത്തതെന്ന് പൊലീസ് വൃത്തങ്ങള്‍ പറഞ്ഞു. വൈ പ്ലസ് വിഭാഗത്തില്‍ ആറ് കമാന്‍ഡോകളും നാല് പോലീസുകാരും ഒരു ട്രാഫിക് ക്ലിയറന്‍സ് വാഹനവും ഉള്‍പ്പെടെ 11 സുരക്ഷാ ഉദ്യോഗസ്ഥരെയാണ് നടന് ലഭിക്കുക. പൊലീസുകാരെ അദ്ദേഹത്തിന്റെ വസതിയായ മന്നത്തില്‍ നിയമിക്കുമെന്നും പൊലീസ് വൃത്തങ്ങള്‍ അറിയിച്ചു.
