കൊച്ചി: ലുലു മാളില് പാര്ക്കിങ് ഫീസ് പിരിക്കുന്നത് നിയമാനുസൃതമെന്ന് ഹൈക്കോടതി. വാണിജ്യ സ്ഥാപനങ്ങളില് പാര്ക്കിങ് ഫീസ് ഈടാക്കുന്നതിന് നിയമപരമായ വിലക്കില്ലെന്ന് ഹൈക്കോടതി ചൂണ്ടിക്കാട്ടി. പാര്ക്കിങ് ഫീസ് ഈടാക്കുന്നതിനെതിരെ ബോസ്കോ കളമശ്ശേരിയും പോളി വടക്കനും നല്കിയ ഹര്ജി ഹൈക്കോടതിയ സിംഗിള് ബെഞ്ച് തീര്പ്പാക്കി.
കെട്ടിട ഉടമയ്ക്ക് അതാത് മുനിസിപ്പാലിറ്റിയോ അല്ലെങ്കില് പഞ്ചായത്തോ കോര്പ്പറേഷനോ നല്കുന്ന ലൈസന്സ് മുഖേന ഉപഭോക്താക്കളില് നിന്ന് പാര്ക്കിങ് ഫീസ് ഈടാക്കാവുന്നതാണെന്ന് ഹൈക്കോടതി വ്യക്തമാക്കി. കെട്ടിടങ്ങള്ക്ക് നിശ്ചിത പാര്ക്കിങ് സൗകര്യം വേണമെന്ന് മാത്രമേ കേരള മുനിസിപ്പാലിറ്റി ബില്ഡിങ് ചട്ടത്തില് പറയുന്നുള്ളൂ. എന്നാല് പാര്ക്കിങ് ഫീസ് പിരിക്കുന്നതിന് വിലക്കില്ലെന്ന് നേരത്തെ മറ്റൊരു കേസില് ചൂണ്ടിക്കാട്ടിയിട്ടുണ്ടെന്ന് കേസ് പരിക്കവെ ജസ്റ്റിസ് വി ജി അരുണ് പറഞ്ഞു.
