മൂവാറ്റുപുഴ: കോവിഡ് നിയന്ത്രണങ്ങളുടെ പശ്ചാത്തലത്തില് റെഗുലര് ക്ലാസ്സ് തുടങ്ങുന്നത് വരെ സ്വകാര്യസ്കൂളുകള് മറ്റ് സ്പെഷ്യല് ഫീസുകള് ഒഴിവാക്കി ടേം ഫീസില് ഇളവ് വരുത്തുന്നതിന് സംസ്ഥാന സര്ക്കാരിന്റെ ഭാഗത്ത് നിന്നും അടിയന്തിര ഇടപെടല് ഉണ്ടാകണമെന്ന് ആവശ്യപ്പെട്ട് ഇടുക്കി എം പി ഡീന് കുര്യക്കോസ് മുഖ്യമന്ത്രിക്ക് കത്ത് നല്കി.
കോവിഡ് മൂലം കേരളത്തിലെ മഹാഭൂരിപക്ഷം സ്വകാര്യ സ്ഥാപനങ്ങളിലെയും തൊഴിലാളികള് ജോലി നഷ്ടപ്പെടലും തൊഴില് ഇല്ലായ്മയും മൂലം സാമ്പത്തീക ബുദ്ധിമുട്ട് നേരിടുകയും, കേരളത്തിലെ സര്ക്കാര്-അര്ദ്ധ സര്ക്കാര് ജീവനക്കാരും അധ്യാപകരും ഉള്പ്പെടെയുള്ളവര് അവരുടെ വരുമാനത്തിന്റെ നിശ്ചിത പങ്ക് കോവിഡ് പ്രതിരോധ പ്രവര്ത്തനങ്ങള്ക്കായി സര്ക്കാരിന് നല്കുകയും ചെയ്തു കൊണ്ടിരിക്കുന്ന സാഹചര്യമാണിത്. റെഗുലര് ക്ലാസ്സ് ഇല്ലാത്ത സാഹചര്യത്തില് നാമമാത്രമായി ഓണ്ലൈന് ക്ലാസുകളിലേക്കു പഠനം ചുരുങ്ങുകയും ചെയ്യുബോള് സ്വകാര്യ സ്കൂളുകള്ക്ക് ഫീസില് ഇളവ് നല്കാന് സാധിക്കും.
കേരളത്തിലെ ഭൂരിപക്ഷം സ്കൂളുകളും മാതാപിതാക്കളുടെ ബുദ്ധിമുട്ട് മനസിലാക്കി റെഗുലര് ക്ലാസ്സ് തുടങ്ങുന്നത് വരെ മറ്റുള്ള ഫീസുകള് ഒഴിവാക്കി ടേം ഫീസില് നിശ്ചിത ശതമാനം ഇളവ് നല്കാന് തയ്യാറായിട്ടുണ്ട്. എന്നാല് ചില സ്വകാര്യ സ്കൂളുകള് ഇപ്പോഴും ഫീസില് ഇളവ് നല്കാന് തയ്യാറായിട്ടില്ല. വിവിധ കോണുകളില് മാതാപിതാകളുടെ ഭാഗത്തുനിന്നും ലഭിച്ചു വരുന്ന പരാതിയുടെ അടിസ്ഥാനത്തിലാണ് മുഖ്യമന്ത്രിയുടെ അടിയന്തിര ഇടപെടല് ആവശ്യപ്പെട്ടുകൊണ്ട് എം.പി. കത്ത് നല്കിയത്.