ന്യൂ ഡല്ഹി : ഒരു പുതിയ ഊര്ജവുമായി തുടങ്ങണമെന്നും ഒപ്പം ഇന്ത്യന് ജനാധിപത്യത്തെ അറിയുകയും വേണമെന്നു നരേന്ദ്രമോദി. എന്ഡിഎയുടെ പാര്ലമെന്ററി പാര്ട്ടി നേതാവായി തെരഞ്ഞെടുത്ത ശേഷം ജനപ്രതിനിധികളെയും ഘടകകക്ഷികളെയും അഭിസംബോധന ചെയ്ത് സംസാരിക്കുകയിരുന്നു അദ്ദേഹം. സെന്ട്രല് ഹാളില് വച്ചിരുന്ന ഭരണഘടനയില് തലതൊട്ട് വന്ദിച്ചായിരുന്നു മോദി പ്രസംഗം ആരംഭിച്ചത്.
ഈ വര്ഷം മതിലുകള് പൊളിച്ച് ഹൃദയങ്ങളെ ഒന്നാക്കി. ലോകം മുഴുവന് ഇന്ത്യന് തെരഞ്ഞെടുപ്പ് ഉറ്റ് നോക്കുകയായിരുന്നു. എന്ഡിഎയെ ഒറ്റക്കെട്ടായി മുന്നോട്ടു കൊണ്ടു പോകും. എന്ഡിഎയ്ക്ക് കിട്ടിയ ഈ ജനവിധി വലിയ ഉത്തരവാദിത്തമാണ് നല്കുന്നത്. അധികാരത്തിന്റെ ഗര്വ്വ് ജനങ്ങള് അംഗീകരിക്കില്ല. ഇന്ത്യന് രാഷ്ട്രീയത്തിലെ മാറ്റങ്ങള്ക്ക് നിങ്ങള് സാക്ഷികളാണ്, ഉത്തരവാദികളുമാണ്. ജനപ്രതിനിധികള്ക്ക് ഭേദഭാവം പാടില്ലെന്നും പിന്തുണച്ചവരെയും അല്ലാത്തവരെയും ഒപ്പം നിറുത്തണമെന്ന് ഭരണഘടന ഓര്മ്മിപ്പിച്ച് കൊണ്ട് മോദി വ്യക്തമാക്കി.
ഈ രാജ്യത്തിന്റെ ഉയര്ച്ചയ്ക്കായാണ് ജനങ്ങള് നമ്മളെ തെരഞ്ഞെടുത്തത്. ഭരണ വിരുദ്ധ വികാരത്തിന് പകരമായി ജനങ്ങള് നമ്മളില് വിശ്വാസമര്പ്പിച്ചത് ഭരണാനുകൂല തരംഗമാണ്. കൂടുകക്ഷി രാഷ്ട്രീയത്തില് ഉറച്ച് മുന്നോട്ട് പോകും. ദേശീയ താല്പര്യവും പ്രാദേശിക സ്വപ്നങ്ങളും ഒന്നിച്ചു നീങ്ങണം. ഏറ്റവുമധികം വനിതാ പ്രതിനിധികള് പാര്ലമെന്റിലെത്തിയ ചരിത്ര മുഹൂര്ത്തമാണ് ഇത്. സ്വതന്ത്ര ഇന്ത്യയില് ഇതാദ്യമായാണ് ഇത്രയുമധികം വനിതാ എംപിമാര് പാര്ലമെന്റിലെത്തുന്നത്. സ്ത്രീ ശാക്തീകരണത്തിലൂടെയാണ് ഇത് സാധ്യമായത്.
പുത്തന് ഊര്ജവുമായി ഒരു പുതിയ ഇന്ത്യ എന്ന നമ്മുടെ തീരുമാനം ഇവിടെ വച്ച് എടുക്കുകയാണ്. ലോകം മുഴുവനുമുള്ള ഇന്ത്യക്കാര് ഈ വിജയത്തിന്റെ ഭാഗമാണ്. സേവനത്തേക്കാള് വലിയ പ്രചോദനം ഇല്ല. നിങ്ങളുടെ നേതാവായി നിങ്ങളെന്നെ തെരഞ്ഞെടുത്തു. എന്നാല് ഞാന് നിങ്ങളിലൊരാളാണ്. നിങ്ങള്ക്ക് തുല്യമാണ്. എല്ലാ എന്ഡിഎ നേതാക്കളും, എന്ഡിഎയുടെ എല്ലാ ഘടകക്ഷികളും തന്നെ നേതാവായി തെരഞ്ഞെടുത്തു. ഇതില് എല്ലാവരോടും തനിക്ക് കടപ്പാടുണ്ടെന്നും മോദി പറഞ്ഞു.
