നടന് പുനീത് രാജ്കുമാറിന്റെ വിയോഗം ഇപ്പോഴും വിശ്വസിക്കാനാവാത്ത അവസ്ഥയിലാണ് കുടുംബവും സഹപ്രവര്ത്തകരും ആരാധകരും. സിനിമകള്ക്കൊപ്പം അദ്ദേഹം ചെയ്തിട്ടുള്ള കാരുണ്യ പ്രവര്ത്തനങ്ങളിലൂടെയുമാണ് പുനീതിനെ ആളുകള് ഓര്ത്തു കൊണ്ടിരിക്കുന്നത്. ഇപ്പോഴിതാ പുനീത് നായകനായ ഡോക്യുമെന്ററി പ്രദര്ശനത്തിനൊരുങ്ങുകയാണ്. ചന്ദന മരങ്ങളുടെ ക്ഷേത്രം എന്നര്ത്ഥം വരുന്ന ‘ഗന്ധാഡഗുഡി’ എന്ന് പേരിട്ടിരിക്കുന്ന ചിത്രത്തിന്റെ ടീസര് പുറത്തു വിട്ടിരിക്കുകയാണ് അണിയറ പ്രവര്ത്തകര്.
അമോഘവര്ഷയാണ് ഡോക്യുമെന്ററി സംവിധാനം ചെയ്തിരിക്കുന്നത്. വന്യജീവി ചലച്ചിത്ര സംവിധായകനായ അമോഘവര്ഷയും പുനീതും ഒന്നിച്ച ഡോക്യുമെന്ററി പുനീതിന്റെ സ്വപ്ന പദ്ധതിയാണ് എന്നാണ് അണിയറ പ്രവത്തകര് പറയുന്നത്. അടുത്ത വര്ഷം തിയറ്ററില് എത്താനൊരുങ്ങുന്ന ചിത്രം അശ്വിനി പുനീത് രാജ്കുമാറാണ് നിര്മിച്ചിരിക്കുന്നത്.
കഴിഞ്ഞ ഒക്ടോബര് 29നാണ് ഹൃദയാഘാതം മൂലം പുനീത് അന്തരിക്കുന്നത്. ജെയിംസ് എന്ന ചിത്രത്തിന്റെ ഷൂട്ടിംഗ് പൂര്ത്തീകരിക്കാനിരിക്കെയായിരുന്നു താരത്തിന്റെ അപ്രതീക്ഷിത വിയോഗം. ജിമ്മില് വ്യായാമം ചെയ്യുന്നതിനിടെ നെഞ്ചുവേദന അനുഭവപ്പെടുകയും ആശുപത്രിയിലെത്തി രണ്ടു മണിക്കൂറിന് ശേഷം മരണത്തിന് കീഴടങ്ങുകയുമായിരുന്നു. മരണ ശേഷം അദ്ദേഹത്തിന്റെ കണ്ണുകള് ദാനം ചെയ്തിരുന്നു.