ഇന്ത്യന് വാഹന മേഖലയില് വിപ്ലവം സൃഷ്ടിച്ച മോഡലാണ് ടാറ്റയുടെ നാനോ. പക്ഷേ ടാറ്റ നാനോ കൊണ്ടൊരു ഹെലികോപ്റ്റര് ഉണ്ടാക്കാന് സാധിക്കുമോ. ബീഹാറുകാരന് ഗുഡ്ഡു ശര്മയോട് ചോദിച്ചാല് സാധിക്കുമെന്നായിരിക്കും മറുപടി. നാനോയെ രൂപമാറ്റം വരുത്തി ഹെലികോപ്റ്റര് രൂപത്തിലാക്കിയിരിക്കുകയാണ് മെക്കാനിക്കായ ഗുഡ്ഡു ശര്മ. ഹെലികോപ്റ്ററിന്റെ പിറകിലെ ചിറകും ഫാനും മുകളിലെ പ്രൊപ്പല്ലറുമെല്ലാം ഗുഡ്ഡു ശര്മ അതേപടി ഉണ്ടാക്കിയിട്ടുണ്ട്.
നാനോയുടെ എഞ്ചിനില് തന്നെയാണ് ഇതൊക്കെ പ്രവര്ത്തിക്കുന്നത്. മുകളിലെയും പിന്നിലെയും ഫാനുകള് കറങ്ങുമെങ്കിലും അകത്ത് കോക്പിറ്റ് ഡിസൈന് നല്കിയിട്ടുണ്ടെങ്കിലും നിര്ഭാഗ്യവശാല് ഈ നാനോ ഹെലികോപ്റ്റര് പറക്കില്ല.
വിവാഹത്തിന് വധുവിനും വരനും വേദിയിലേക്ക് വരാന് ഹെലികോപ്റ്റര് ഉപയോഗിക്കണമെന്ന സാധാരണക്കാരന്റെ ആഗ്രഹം സഫലമാക്കാനാണ് ഗുഡ്ഡു ശര്മ ഇത്തരത്തിലൊരു കാര് നിര്മിച്ചത്. രണ്ടു ലക്ഷം രൂപയാണ് നാനോയെ ഈ രൂപത്തിലാക്കാന് ഗുഡ്ഡുവിന് ചെലവായത്. എന്നിരുന്നാലും സാധാരണക്കാര്ക്ക് വേണ്ടി 15,000 രൂപ മാത്രമാണ് ഒരു വിവാഹത്തിന് ഈ കാര് ഉപയോഗിച്ചാല് വാടകയായി ഗുഡ്ഡു വാങ്ങുന്നത്. നിലവില് നിരവധി ബുക്കിങുകളാണ് തന്റെ നാനോ ഹെലികോപ്റ്ററിന് ലഭിച്ചുകൊണ്ടിരിക്കുന്നതെന്ന് ഗുഡ്ഡു പറഞ്ഞു.
ഇന്ത്യയില് ആദ്യമായല്ല നാനോയെ ഹെലികോപ്റ്ററാക്കി രൂപമാറ്റം വരുത്തുന്നത്. 2019 ല് ബീഹാറില് നിന്നു തന്നെയുള്ള ചപ്ര ഇത്തരത്തില് നാനോ ഉപയോഗിച്ച് ഹെലികോപ്റ്റര് നിര്മിച്ചിരുന്നു.