റിയാദ്: സൗദി അറേബ്യയിലെ നജ്റാനിൽ വാഹനാപകത്തില് രണ്ട് മലയാളി നഴ്സുമാര് മരിച്ചു. കോട്ടയം സ്വദേശി ഷിന്സി ഫിലിപ്പ് (28), തിരുവന്തപുരം സ്വദേശി അശ്വതി വിജയന് (31) എന്നിവരാണ് മരിച്ചത്.
വാഹനത്തിലുണ്ടായിരുന്ന മറ്റ് മൂന്നു മലയാളികള് പരിക്കുകളോടെ ആശുപത്രിയിൽ ചികിത്സയിലാണ്. സ്നേഹ, റിന്സി, ഡ്രൈവര് അജിത്ത് എന്നിവരാണ് പരിക്കുകളോടെ ആശുപത്രിയിലുള്ളത്. നജ്റാന് കിംഗ് ഖാലിദ് ആശുപത്രിയിലെ നഴ്സുമാരായി ജോലി ചെയ്യുകയാണ്. ഇവർ സഞ്ചരിച്ച വാഹനത്തില് മറ്റൊരു വാഹനം വന്നിടിച്ചാണ് അപകടമുണ്ടായത്.
മരിച്ചവരുടെ മൃതദേഹങ്ങള് നജ്റാന് ജനറല് ആശുപത്രി മോര്ച്ചറിയില് സൂക്ഷിച്ചിരിക്കുകയാണ്. അനന്തര നടപടികളുമായി സൗദിയിലെ യുണൈറ്റഡ് നഴ്സസ് അസോസിയേഷന് ഭാരവാഹികള് രംഗത്തുണ്ട്. അപകടത്തില് പരിക്കേറ്റ സ്നേഹ, റിന്സി എന്നീ നഴ്സുമാര് നജ്റാന് ജനറല് ആശുപത്രിയിലും ഡ്രൈവര് അജിത്ത് നജ്റാന് കിംഗ് ഖാലിദ് ആശുപത്രിയിലും ചികിത്സയിലാണ്.
