എറണാകുളം ജില്ലയില്‍ കൊവിഡ് പ്രതിരോധം ഊര്‍ജ്ജിതമാക്കുന്നതിന്റെ ഭാഗമായി തദ്ദേശ സ്വയം ഭരണ സ്ഥാപനങ്ങളില്‍ ഈ മാസം 23ന് മുന്‍പായി ഫസ്റ്റ്‌ലൈന്‍ ട്രീറ്റ്‌മെന്റ് സെന്റെറുകള്‍ സജ്ജമാക്കുന്ന പ്രവര്‍ത്തനങ്ങള്‍ തുടങ്ങിയെന്ന് മന്ത്രി വി.എസ് സുനില്‍കുമാര്‍. ജില്ലയിലെ എം.പിമാര്‍, എം.എല്‍.എല്‍.എമാര്‍ എന്നിവരുമായി നടത്തിയ വീഡിയോ കോണ്‍ഫറന്‍സില്‍ ജില്ലയിലെ രോഗപ്രതിരോധ പ്രവര്‍ത്തനങ്ങള്‍ ചര്‍ച്ച ചെയ്തു. ചെല്ലാനം, ആലുവ, കീഴ്മാട് , മുനമ്പം പ്രദേശങ്ങളില്‍ പരിശോധനകള്‍ വര്‍ദ്ധിപ്പിക്കുമെന്ന് മന്ത്രി അറിയിച്ചു. പ്രാഥമിക ആരോഗ്യകേന്ദ്രങ്ങളിലടക്കം കോവിഡിതര രോഗികള്‍ക്കാവശ്യമായ സൗകര്യങ്ങള്‍ വര്‍ദ്ധിപ്പിക്കും. ഫസ്റ്റ്‌ലൈന്‍ ട്രീറ്റ്‌മെന്റ് സെന്റെറുകള്‍ക്കായുള്ള വിശദമായ മാര്‍ഗരേഖ നല്‍കുമെന്ന് ജില്ലാ കളക്ടര്‍ എസ്. സുഹാസ് പറഞ്ഞു. കണ്ടയ്‌മെന്റ് സോണുകളെക്കുറിച്ച് കൃത്യമായ മാര്‍ഗനിര്‍ദേശങ്ങള്‍ നല്‍കണമെന്നും രോഗനിര്‍ണ്ണയ പരിശോധനകള്‍ വര്‍ദ്ധിപ്പിക്കണമെന്നും ജനപ്രതിനിധികള്‍ പറഞ്ഞു. വീഡിയോ കോണ്‍ഫറന്‍സില്‍ എം.പിമാരായ തോമസ് ചാഴികാടന്‍, ഡീന്‍ കുര്യാക്കോസ്, ഹൈബി ഈഡന്‍, എം.എല്‍.എമാരായ കെ.ജെ മാക്‌സി, റോജി എം. ജോണ്‍, വി.ഡി സതീശന്‍, അന്‍വര്‍ സാദത്ത്, ടി.ജെ വിനോദ്, എല്‍ദോ എബ്രഹാം, പി.ടി തോമസ്, വി.പി സജീന്ദ്രന്‍, ആന്റണി ജോണ്‍, ജോണ്‍ ഫെര്‍ണാണ്ടസ്, വി. കെ ഇബ്രാഹിം കുഞ്ഞ്, എം. സ്വരാജ്, അനൂപ് ജേക്കബ്, എസ്. ശര്‍മ, എന്നിവര്‍ പങ്കെടുത്തു.
