കോട്ടയം: പാലാ നഗരസഭ ചെയര്മാനെ സിപിഎം തീരുമാനിക്കുമെന്ന് കേരള കോണ്ഗ്രസ് ചെയര്മാന് ജോസ് കെ മാണി. ആരെ തീരുമാനിച്ചാലും അംഗീകരിക്കും. പാലായിലേത് പ്രാദേശിക കാര്യമാണ്. ബിനു പുളിക്കക്കണ്ടത്തെ ചെയര്മാനായി തീരുമാനിച്ചാലും പിന്തുണയ്ക്കുമെന്നും ജോസ് കെ മാണി അറിയിച്ചു.
അതേസമയം ചെയര്മാന് സ്ഥാനാര്ത്ഥിയായി ആരെ നിയമിക്കുമെന്നത് ചര്ച്ച ചെയ്യാന് സിപിഎം ഇന്ന് വൈകിട്ട് പാര്ലമെന്ററി പാര്ട്ടിയോഗം വിളിച്ചു ചേര്ത്തിട്ടുണ്ട്. ചെയര്മാന് ആരാകണമെന്ന സിപിഎം തീരുമാനത്തില് ഇടപെടില്ലെന്ന് കേരളാ കോണ്ഗ്രസ് സംസ്ഥാന ജനറല് സെക്രട്ടറി സ്റ്റീഫന് ജോര്ജ് പറഞ്ഞു. ബിനു പുളിക്കക്കണ്ടത്തെ തീരുമാനിച്ചാല് പിന്തുണയ്ക്കും. മുന്നണി ധാരണകള് പൂര്ണമായി പാലിക്കുമെന്നും സ്റ്റീഫന് ജോര്ജ് വ്യക്തമാക്കി.
ബിനു പുളിക്കക്കണ്ടത്തെ സ്ഥാനാര്ഥിയാക്കുന്നതില് നേരത്ത കേരള കോണ്ഗ്രസ് എതിര്പ്പ് അറിയിച്ചിരുന്നു. ബിജെപിയില് നിന്നും സിപിഎമ്മില് ചേര്ന്ന വ്യക്തിയാണ് ബിനു പുളിക്കക്കണ്ടം. ഇതുകൂടാതെ കേരളാ കോണ്ഗ്രസ് അംഗത്തെ നഗരസഭയില് വെച്ച് മര്ദ്ദിച്ചുവെന്ന ആരോപണവും ഇദ്ദേഹത്തിനെതിരെയുണ്ട്. ഈ സംഭവത്തില് ബിനുവിനെതിരെ കേസും നിലവിലുണ്ട്. അതുകൊണ്ട് ബിനുവിനെ അംഗീകരിക്കാന് ബുദ്ധിമുട്ടാണെന്നായിരുന്നു കേരളാ കോണ്ഗ്രസ് എമ്മിന്റെ മുന് നിലപാട്.