തിരുവനന്തപുരം: സംസ്ഥാനത്ത് വരള്‍ച്ച അതി രൂക്ഷമാകുമെന്ന് സിഡബ്യൂആര്‍ഡിഎം. ഭൂഗര്‍ഭ ജലനിരപ്പ് വലിയതോതില്‍ താഴുന്നത് ആശങ്ക കൂട്ടുകയാണ്. ശാസ്ത്രീയമായ ജലസംരക്ഷണ മാര്‍ഗങ്ങള്‍ തേടിയില്ലെങ്കില്‍ സ്ഥിതി ഗുരുതരമാകുമെന്നും വിദഗ്ധര്‍ അഭിപ്രായപ്പെടുന്നു.
ചൂടിന് ആശ്വാസമേകി വേനല്‍ മഴയെത്താന്‍ രണ്ടാഴ്ച കൂടി കാത്തിരിക്കണമെന്ന് വിദഗ്ധര്‍ പറയുന്നു. ഒക്ടോബര്‍ മാസം മുതല്‍ ലഭിക്കേണ്ടിയിരുന്ന മഴയില്‍ കാര്യമായ കുറവുണ്ടായി. പാലക്കാട്, കാസര്‍കോട്, തൃശൂര്‍, കോഴിക്കോട് ജില്ലകളില്‍ 40 ശതമാനം വരെയാണ് കുറവ്. ഈ ജില്ലകളില്‍ ഭൂഗര്‍ഭ ജല വിധാനവും താഴ്ന്നു.
വടക്കന്‍ ജില്ലകളില്‍ വരും ദിവസങ്ങളില്‍, ഭൂഗര്‍ഭ ജലനിരപ്പ് ഇനിയും താഴുമെന്ന് സിഡബ്യുആര്‍ഡിഎന്‍റെ പഠനം വ്യക്തമാക്കുന്നു.
