തിരുവനന്തപുരം: നവകേരളനിര്മ്മാണം സംബന്ധിച്ച പ്രതിപക്ഷത്തിന്റെ അടിയന്തര പ്രമേയത്തെ പരിഹസിച്ച് മുഖ്യമന്ത്രി. ചാനല് ഇംപാക്ട് എന്ന് വരുത്തിത്തീര്ക്കാനുള്ള ഒത്തുകളിയാണ് ഇതെന്നും അദ്ദേഹം ആരോപിച്ചു. പ്രളയം ഉണ്ടായി ഒരു വര്ഷം കഴിഞ്ഞിട്ടും ഒന്നും നടന്നിട്ടില്ലെന്ന് റിപ്പോർട്ട് ചെയ്തതിന് മാധ്യമങ്ങളെ എന്തിനു കുറ്റപ്പെടുത്തുന്നു എന്ന് പ്രതിപക്ഷ നേതാവ് രമേശ് ചെന്നിത്തല പ്രതികരിച്ചു.
‘റീ ബിൽഡ് കേരള’ പരാജയമെന്ന് പറയുന്നവർ പ്രത്യേക മനസ്ഥിതിയുള്ളവരാണ്. അത്തരക്കാര് ദിവാസ്വപ്നം കാണുകയാണെന്നും മുഖ്യമന്ത്രി പറഞ്ഞു. പ്രളയ ദുരന്തനിവാരണത്തിൽ നിന്നും മാറി നിന്നവരാണ് പദ്ധതി പരാജയമാണെന്ന് ആരോപിക്കുന്നതെന്നും അദ്ദേഹം കുറ്റപ്പെടുത്തി.
വി ഡി സതീഷനെപ്പോലെയൊരു അംഗം ഉന്നയിച്ച ചോദ്യങ്ങളെ ചാനല് ഇംപാക്ട് എന്ന് പറഞ്ഞത് ശരിയായില്ലെന്ന് മുഖ്യമന്ത്രിയുടെ പരാമര്ശങ്ങള്ക്ക് പ്രതികരണമായി രമേശ് ചെന്നിത്തല അഭിപ്രായപ്പെട്ടു.
