ഇലക്ട്രിക്ക് വാഹനമാണ് ഭാവി എന്ന് തിരിച്ചറിഞ്ഞുള്ള പ്രവര്‍ത്തനങ്ങളിലാണ് എല്ലാ വാഹന നിര്‍മ്മാതാക്കളും. ഇലക്ട്രിക്ക് ബൈക്കുകള്‍ ജനപ്രിതി നേടി വരുന്ന ഇക്കാലത്ത് പുതിയ ചുവടുവയ്പ്പിലേക്ക് കടക്കുകയാണ് ജനപ്രിയ വാഹന നിര്‍മ്മാതാക്കളായ റോയല്‍ എന്‍ഫീല്‍ഡ് (Royal Enfield). പുതിയ ഇലക്ട്രിക് ബൈക്ക് പുറത്തിറക്കാനുള്ള പ്രവര്‍ത്തനങ്ങളിലാണ് ഇപ്പോള്‍ കമ്പനി.
വളരെ വ്യത്യസ്തമായ ഡിസൈനുമായിട്ടാണ് റോയല്‍ എന്‍ഫീല്‍ഡിന്റെ ഇലക്ട്രിക്ക് ബൈക്ക് പുറത്തിറങ്ങുക എന്നാണ് സൂചനകള്‍. കമ്പനിയുടെ ആദ്യത്തെ ഇലക്ട്രിക്ക് ബൈക്കിന്റെ കണ്‍സപ്റ്റ് ഇമേജുകള്‍ ഇതിനകം തന്നെ പുറത്ത് വന്നിട്ടുണ്ട്.
റോയല്‍ എന്‍ഫീല്‍ഡ് ഈ ഇലക്ട്രിക്ക് ബൈക്കിന് ഇപ്പോള്‍ കമ്പനിക്ക് അകത്ത് നല്‍കിയിരിക്കുന്ന പേര് ഇലക്ട്രിക്ക്01 എന്നാണ്. ഇത് താല്കാലികമായി നല്‍കിയ പേരാവാനാണ് സാധ്യത. പുറത്ത് വന്നിരിക്കുന്ന റോയല്‍ എന്‍ഫീല്‍ഡ് ഇലക്ട്രിക്ക് ബൈക്കിന്റെ കണ്‍സപ്റ്റ് ഇമേജുകള്‍ അതേപടി ശരി വയ്ക്കുന്ന തരത്തിലാകണം പുതിയ ബൈക്ക് അവതരിപ്പിക്കുക എന്ന് പറയാനാകില്ല. ഈ ഡിസൈനില്‍ മാറ്റങ്ങള്‍ ഉണ്ടായേക്കും. ഈ ബൈക്കില്‍ ഫ്രണ്ട് സസ്പെന്ഷന് സാധാരണ കാണാത്ത വിധത്തിലുള്ള ഗര്‍ഡര്‍ ഫോര്‍ക്കിന്റെ രൂപത്തിലാണ് ഉള്ളത്. നിയോ-റെട്രോ സ്‌റ്റൈലിലുള്ള ഇലക്ട്രിക് ബൈക്കായിരിക്കും എന്‍ഫീല്‍ഡ് പുറത്തിറക്കുക എന്നും റിപ്പോര്‍ട്ടുകള്‍ സൂചിപ്പിക്കുന്നു.
റോയല്‍ എന്‍ഫീല്‍ഡ് ഇലക്ട്രിക്ക് ബൈക്കിന്റെ പിന്‍ഭാഗത്ത് ഒരു മോണോ-ഷോക്ക് സസ്പെന്ഷന് ഉണ്ടായിരിക്കുമെന്നും സൂചനകളുണ്ട്. ഹിമാലയന്‍ അടക്കമുള്ള ചില ബൈക്കുകളില്‍ ഇത്തരം മോണോ ഷോക്ക് സസ്പെന്ഷന് റോയല്‍ എന്‍ഫീല്‍ഡ് മുമ്പും ഉപയോഗിച്ചിട്ടുണ്ട്. നിയോ-വിന്റേജ്, ക്ലാസിക് സ്‌റ്റൈലുള്ള ബൈക്കില്‍ ടാക്റ്റൈല്‍ ഫിനിഷുകളും ഉണ്ടായിരിക്കുമെന്നാണ് റിപ്പോര്‍ട്ടുകള്‍ നല്‍കുന്ന സൂചനകള്‍. വൃത്താകൃതിയിലുള്ള ഹെഡ്‌ലൈറ്റും സാധാരണ എന്‍ഫീല്‍ഡ് ബൈക്കുകളില്‍ കാണുന്ന രീതിയിലുള്ള ഫ്യൂവല്‍ ടാങ്കും ഇലക്ട്രിക്ക്01 എന്ന മോഡലില്‍ ഉണ്ടാകുമെന്ന് പ്രതീക്ഷിക്കുന്നു.
ഫ്യൂവല്‍ ടാങ്കില്‍ പെട്രോള്‍ നിറയ്‌ക്കേണ്ട ആവശ്യമില്ലാത്തതിനാല്‍ ഇത് തുറക്കാനും സാധനങ്ങള്‍ വയ്ക്കാനും സാധിക്കുന്ന രീതിയിലുള്ള ഒരു സ്റ്റോറേജ് സ്‌പൈസായി ഉപയോഗിക്കാനാണ് സാധ്യത. ഹെഡ്‌സ്റ്റോക്കിന്റെ രണ്ട് ഭാഗത്തുനിന്നും ആരംഭിക്കുന്ന ഫ്രെയിം ട്യൂബുകളുള്ള രീതിയില്‍ ആയിരിക്കും ഈ വാഹനത്തിന്റെ പ്ലാറ്റ്‌ഫോം ഉണ്ടാവുകയെന്നും റിപ്പോര്‍ട്ടുകള്‍ പറയുന്നു.
ക്വാളിറ്റി ഫംഗ്ഷന്‍ ഡെവലപ്മെന്റ് എന്ന ഘട്ടത്തിലാണ് റോയല്‍ എന്‍ഫീല്‍ഡിന്റെ പുതിയ ഇലക്ട്രിക്ക് ബൈക്കുള്ളത്. ഉപഭോക്താക്കളുടെ പ്രതികരണവും ആവശ്യങ്ങളുമെല്ലാം തിരിച്ചറിഞ്ഞ ശേഷമായിരിക്കും ഇത് കൂടുതല്‍ വികസിപ്പിക്കുന്നത്.
