ഒറ്റ പേജില് ഒതുങ്ങുന്നതും എളുപ്പത്തില് പൂരിപ്പിക്കാന് കഴിയുന്നതുമായ ജി എസ് ടി റിട്ടേണ് ഫോമുകള് ലഭ്യമാക്കുമെന്ന് കേന്ദ്ര ഫിനാന്സ് സെക്രട്ടറി ഹസ്മുഖ് ആദിയ. ആറ് മാസത്തിനുള്ളില് ഇത് വ്യാപാരികളില് എത്തും. ജി എസ് ടി കൗണ്സിലിന്റെ നിര്ദേശ പ്രകാരം ധന വകുപ്പ് രണ്ടു രീതിയിലുള്ള ഫോമുകള് തയാറാക്കിയിട്ടുണ്ട്.
താത്കാലിക ക്രെഡിറ്റ് ലഭ്യമാക്കുന്നതിനുള്ള സംവിധാനം ഈ ഫോമുകളില് ഇല്ലാത്തത് ന്യൂനതയാണ്. ഇത് ഒഴിവാക്കി കൂടുതല് ലളിതമായി ഫോം തയാറാക്കാന് ജി എസ് ടി കൗണ്സില് ആവശ്യപെട്ടിട്ടുണ്ട്. ഇത് ഉടന് തന്നെ പൂര്ത്തിയാക്കുമെന്ന് ആദിയ പറഞ്ഞു. നിലവിലുള്ള മൂന്ന് ഫോമുകള്ക്ക് പകരം മാസം തോറും ഒറ്റ ഫോം സമര്പ്പിക്കുന്ന രീതിയാണ് വരാന് പോകുന്നത്. ഇപ്പോള് വര്ഷത്തില് 36 റിട്ടേണുകളാണ് ഒരു വ്യാപാരി സമര്പ്പിക്കേണ്ടത്. ഇത് 12 ആയി ചുരുങ്ങും. റിട്ടേണ് ഫയലിംഗ് ലളിതമാക്കുമെന്ന് നേരത്തെ ധന മന്ത്രി വ്യക്തമാക്കിയിരുന്നു. എന്നാല് ഇത് നടപ്പാക്കാത്തതിനാല് ചെറുകിട, ഇടത്തരം വ്യപാരികള് ഒട്ടേറെ ബുദ്ധിമുട്ടുകള് നേരിട്ടിരുന്നു.