ന്യൂഡല്ഹി: രാജ്യത്ത് വീണ്ടും നോട്ട് ക്ഷാമം. വിവിധ സംസ്ഥാനങ്ങളിലെ എ.ടി.എമ്മുകളിലൊന്നും പണമില്ലെന്നാണ് റിപ്പോര്ട്ട്. കര്ണാടക, മഹാരാഷ്ട്ര, ആന്ധ്രപ്രദേശ്, രാജസ്ഥാന്, ഉത്തര്പ്രദേശ്, മധ്യപ്രദേശ്, തെലങ്കാന എന്നിവിടങ്ങളിലെ ജനങ്ങളാണ് എ.ടി.എമ്മുകളില് പണമില്ലെന്ന പരാതിയുമായി എത്തിയിരിക്കുന്നത്. ഡല്ഹിയിലെ ജനങ്ങളും എ.ടി.എമ്മുകളില് പണമില്ലെന്ന് പറയുന്നു.
നോട്ടു നിരോധന കാലത്തെ കറന്സി ക്ഷാമത്തെ ഓര്മിപ്പിക്കും വിധം നീണ്ട നിരകളാണ് എ.ടി.എമ്മുകള്ക്ക് മുന്നിലുള്ളത്. ഇന്നലെ മുതല് തന്നെ എ.ടി.എമ്മുകള് പ്രവര്ത്തിക്കുന്നില്ലെന്ന് ഹൈദരാബാദിലും വാരണാസിയിലും ജനങ്ങള് പരാതിപ്പെട്ടതായി എ.എന്.ഐ റിപ്പോര്ട്ട് ചെയ്യുന്നു.