തൊഴില് മേഖലയില് ഇടതു മുന്നണി സര്ക്കാര് പ്രഖ്യാപിച്ച വാഗ്ദാനങ്ങളൊന്നും നടപ്പായില്ലെന്നും വിലക്കയറ്റം കൊണ്ടു പൊറുതിമുട്ടുന്ന തൊഴിലാളികളെ സര്ക്കാര് വലയ്ക്കുകയാണെന്നും മുന് പ്രതിപക്ഷ നേതാവ് രമേശ് ചെന്നിത്തല കുറ്റപ്പെടുത്തി. സ്വര്ണ്ണ കള്ളക്കടത്തില് മുഖ്യമന്ത്രിയെ ജനം കയ്യോടെ പിടികൂടിയെന്നും ഇന്ത്യാ ചരിത്രത്തില് ഇതുപോലൊരു സര്ക്കാര് കൊള്ള ഇതിനു മുമ്പുണ്ടായിട്ടില്ലെന്നും രമേശ് ചെന്നിത്തല പറഞ്ഞു.
ഐ.എന്.ടി.യു.സി. സംസ്ഥാന കമ്മിറ്റിയുടെ ആഭിമുഖ്യത്തില് വിവിധ ആവശ്യങ്ങളുന്നയിച്ച് നടത്തിയ സെക്രട്ടേറിയേറ്റ് മാര്ച്ച് ഉദ്ഘാടനം ചെയ്തു സംസാരിക്കുകയായിരുന്നു ചെന്നിത്തല. കെ.എസ്സ്.ആര്.ടി.സിയെ സര്ക്കര് ദുര്ബ്ബലപ്പെടുത്തി. നിര്മ്മാണ മേഖലയും പരമ്പരാഗത തൊഴില് വ്യവസായ മേഖലകളും സ്തംഭിച്ചു.ആട്ടോ-ടാക്സി തൊഴിലാളികള് പട്ടിണിയിലായി. സര്ക്കാരിന് തൊഴിലാബികളോട് പ്രതിബദ്ധതയില്ല. കമ്മീഷനും ഭരണകൂട ധന കൊള്ളയുമാണ് കേരളത്തില് നടക്കുന്നതെന്നും രമേശ് ചെന്നിത്തല പറഞ്ഞു.
ഐ.എന്.ടി.യു.സി. സംസ്ഥാന പ്രസിഡന്റ് ആര്. ചന്ദ്രശേഖരന് അദ്ധ്യക്ഷത വഹിച്ചു. തൊഴിലാളികളെ വഞ്ചിക്കുന്ന ഇടതു സര്ക്കാരിനെതിരെ സന്ധിയില്ലാത്ത സമരം തുടങ്ങുമെന്ന് ചന്ദ്രശേഖരന് പ്രഖ്യാപിച്ചു. സി.സി.സി.സി.പ്രസിഡന്റ് പാലോട് രവി, വി.എസ്സ്.ശിവകുമാര്, ഐ.എന്.ടി.യു.സി. തിരുവനന്തപുരം ജില്ലാ പ്രസിഡന്റ് വി.ആര്. പ്രതാപന്, വി.ജെ. ജോസഫ് എന്നിവര് പ്രസംഗിച്ചു.
പാളയം രക്തസാക്ഷി മണ്ഡപത്തില് നിന്നാരംഭിച്ച ആയിരങ്ങള് പങ്കെടുത്ത പ്രകടനത്തിന് ഐ.എന്.ടി.യു.സി. ജില്ലാ പ്രസിഡന്റുമാരായ പി.ജി.ദേവ്, ജോസ് ജോര്ജ്ജ് പ്ലാത്തോട്ടം, വി.പി. ഫിറോസ്, മനോജ് ചിങ്ങന്നൂര്, പി.പി. ആലി, ജോര്ജ് കരിമറ്റം, മലയാലപ്പുഴ ജ്യോതിഷ്കുമാര്,എ.കെ. ഹഫീസ് അഖിലേന്ത്യാ ഭാരവാഹികളായ ഡോ.എം.പി. പത്മനാഭന്, കെ.പി.തമ്പി കണ്ണാടന്, ആര്.എം.പരമേശ്വരന്, വനിതാ വിഭാഗം സംസ്ഥാന പ്രസിഡന്റ് കൃഷ്ണവേണി.ജി.ശര്മ്മ എന്നിവര് നേതൃത്വം നല്കി.