മൂവാറ്റുപുഴ: പ്രണയം നിരസിച്ചതിലുള്ള പകയാണ് സിംനയെ കൊലപ്പെടുത്താന് കാരണമെന്ന് മൂവാറ്റുപുഴ ജനറല് ആശുപത്രിയില് വെച്ച് യുവതിയെ കുത്തിക്കൊലപ്പെടുത്തിയ കേസിലെ പ്രതി ഷാഹുല് അലി. പ്രതിയുടെ അറസ്റ്റ് പോലിസ് രേഖപെടുത്തി. മെഡിക്കല് കോളേജില് നിന്നും ഡിസ്ചാര്ജ്ജ് ചെയ്ത ശേഷമാണ് ഷാഹുല് അലിയെ അറസ്റ്റ് ചെയ്തത്. കുറ്റകൃത്യം സംഭവിച്ച ആശുപത്രിയിലും കത്തിവാങ്ങിയ കടയിലുമെത്തിച്ച് തെളിവെടുത്തശേഷം പൊലീസ് പ്രതിയെ കോടതിയില് ഹാജരാക്കി റിമാന്റു ചെയ്തു.
സിംനയും ഷാഹുലും നേരത്തെ സുഹൃത്തുക്കളായിരുന്നു. ഷാഹുല് പലതവണ കൊല്ലപ്പെട്ട സിംനയോട് പ്രണയാഭ്യര്ത്ഥന നടത്തിയിരുന്നു. എന്നാല് യുവതി അതെല്ലാം നിരസിച്ചു. ഇതോടെ പകയായി. ഇതിനിടെ യുവതിക്ക് മറ്റാരുമായോ ബന്ധമുണ്ടെന്ന സംശയമുണ്ടായതിനെ തുടര്ന്നാണ് യുവതിയെ കുത്തി കൊലപ്പെടുത്തിയതെന്നാണ് അന്വേഷണ ഉദ്യോഗസ്ഥര്ക്ക് ഇയാള് നല്കിയ മൊഴി.
ഞായറാഴ്ച്ച സിംനയുടെ നീക്കങ്ങള് നിരീക്ഷിച്ചിരുന്നു. സിംന ആശുപത്രിയിലെത്തിയെന്ന് ഉറപ്പായതോടെയാണ് കൊലപ്പെടുത്താന് തീരുമാനിച്ചതെന്നും പ്രതി മൊഴി നല്കിയിട്ടുണ്ട്. കൊലപ്പെടുത്തിയതെങ്ങനെയെന്നും രക്ഷപ്പെട്ട രീതിയുമൊക്കെ ആശുപത്രിയിലെത്തിച്ച് തെളിവെടുത്തപ്പോള് ഷാഹുല് അലി പൊലീസിനോട് വിവരിച്ചിട്ടുണ്ട്. സിംനയെ കുത്താനുപയോഗിച്ച കത്തി വാങ്ങിയ കടയിലും വാഹനം പാര്ക്കുചെയ്ത സ്ഥലത്തുമെല്ലാം പ്രതിയെ എത്തിച്ച് പൊലീസ് തെളിവെടുത്തു.
ഇക്കഴിഞ്ഞ മാര്ച്ച് 31ന് ആണ് മൂവാറ്റുപുഴ ജനറല് ആശുപത്രിയില് വെച്ച് സിംനയെ ഷാഹുല് അലി കുത്തിക്കൊലപ്പെടുത്തിയത്. സ്ത്രീകളുടെയും കുട്ടികളുടെയും പുതിയ വാര്ഡ് കെട്ടിടത്തില് വെച്ചാണ് ആക്രമണമുണ്ടായത്.