കൊല്ലം :യാത്രക്കാരന് കൊല്ലം കെ.എസ്.ആര്‍.ടി.സി.ഡിപ്പോയില്‍ മര്‍ദനം. നിര്‍മാണമേഖലയിലെ ഫയര്‍ ആന്‍ഡ് സേഫ്റ്റി കരാറുകാരനും തൊഴിലാളിയുമായ, കൊട്ടാരക്കര കുളക്കട ഷീജാസദനത്തില്‍ ഷാജിമോനാണ് മര്‍ദനമേറ്റത്. ഡിപ്പോയിലെ ഗാര്‍ഡ് സുനില്‍കുമാറാണ് മര്‍ദ്ധിച്ചതെന്ന് തിരിച്ചറിഞ്ഞു. ഇയാളെ കൊല്ലം ഈസ്റ്റ് പോലീസ് അറസ്റ്റ് ചെയ്ത് ജാമ്യത്തില്‍ വിട്ടു.
ആറ്റിങ്ങലിലേക്ക് പോകാനുള്ള ബസ് എപ്പോഴാണെന്നു ചോദിച്ചപ്പോള്‍ ഗാര്‍ഡും മറ്റൊരു സെക്യൂരിറ്റി ജീവനക്കാരനും മോശമായി പെരുമാറുകയായിരുന്നെന്ന് ഷാജി പറഞ്ഞു. ഉന്തുംതള്ളും ഉണ്ടായപ്പോള്‍ സ്റ്റാന്‍ഡിനു പുറത്തേക്കുവന്ന തന്നെ പിന്നിലൂടെ വന്ന് ആക്രമിക്കുകയായിരുന്നു. മാര്‍ച്ച് 31-ന് രാത്രി 12 മണി കഴിഞ്ഞപ്പോഴായിരുന്നു സംഭവം. ജില്ലാ ആശുപത്രിയില്‍ ചികിത്സതേടി. തലയ്ക്കാണ് മര്‍ദനമേറ്റതെന്നും ഷാജി പറഞ്ഞു. സംഭവം സംബന്ധിച്ച് കെ.എസ്.ആര്‍.ടി.സി. ചീഫ് ഓഫീസിലേക്ക് റിപ്പോര്‍ട്ട് നല്‍കിയിട്ടുണ്ടെന്ന് കൊല്ലം ഡിപ്പോ അധികൃതര്‍ പറഞ്ഞു.
