വയനാട്: ഡോക്ടര് എന്ന വ്യാജേനെ സ്ത്രീകളുമായി സൗഹൃദം സ്ഥാപിച്ച് വിവാഹ വാഗ്ദാനം നല്കി പണവും സ്വര്ണവും തട്ടിയ കേസിലെ പ്രതി അറസ്റ്റില്. സുല്ത്താന് ബത്തേരി കൊളഗപ്പാറ താന്നിലോട് സ്വദേശി കിഴക്കേ വീട്ടില് സുരേഷ് (45) എന്നയാളാണ് പിടിയിലായത്. ഡോക്ടര് സുരേഷ് കുമാര്, ഡോക്ടര് സുരേഷ് കിരണ്, ഡോക്ടര് കിരണ് കുമാര് എന്നിങ്ങനെ വിവിധ പേരുകളിലാണ് ഇയാള് തട്ടിപ്പ് നടത്തിയത്.
വയനാട് സ്വദേശിനിയുടെ പരാതിയിലാണ് അറസ്റ്റ്. തിരുവനന്തപുരത്ത് ഒളിവില് താമസിച്ചുവരവെയാണ് പിടികൂടിയത്. ഇയാളുടെ കയ്യില് നിന്നും 30,000 രൂപ, അഞ്ച് മൊബൈല് ഫോണുകള്, ഡോക്ടര് എംബ്ലം പതിച്ച വാഗണര് കാര്, രണ്ടര പവനോളം വരുന്ന സ്വര്ണ്ണ മാല, ഡോക്ടര്മാര് ഉപയോഗിക്കുന്ന സ്റ്റെതസ്കോപ്പ്, കോട്ട് എന്നിവയും പൊലീസ് കണ്ടെടുത്തു.
അപ്പോളോ ഹോസ്പിറ്റല്, അമൃത ഹോസ്പിറ്റല് എന്നിവിടങ്ങളിലെ ഡോക്ടര് ആണെന്നായിരുന്നു ഇയാള് ആളുകളോട് പറഞ്ഞിരുന്നത്. ഹോസ്പിറ്റല് തുടങ്ങാം എന്ന് പറഞ്ഞ് കബളിപ്പിച്ചാണ് പല സ്ത്രീകളില് നിന്നും ഇയാള് പണം തട്ടിയത്. ഇയാളുടെ പേരില് കേരളത്തില് വിവിധ പോലീസ് സ്റ്റേഷനുകളില് വിവാഹ വാഗ്ദാനം നല്കി പീഡിപ്പിച്ച കേസുകള് നിലവിലുണ്ട്. സ്ത്രീ പീഡനക്കേസില് ബത്തേരി പോലീസ് സ്റ്റേഷന് രജിസ്റ്റര് ചെയ്ത കേസിലെ പ്രതിയും തിരുവല്ല പോലീസ് സ്റ്റേഷനില് രജിസ്റ്റര് ചെയ്ത ചീറ്റിംഗ് കേസിലെ പിടികിട്ടാപ്പുള്ളിയുമാണ് ഇയാള്. കല്പ്പറ്റ എ എസ് പി തപോഷ് ബസുമധാരിയുടെ നേതൃത്വത്തിലുളള സംഘം സുരേഷിനെ പിടികൂടിയത്. ജില്ലക്ക് അകത്തും പുറത്തുമുളള നിരവധിയാളുകള് ഇയാളുടെ തട്ടിപ്പിനിരയായിട്ടുണ്ടെന്ന് പൊലീസ് പറഞ്ഞു. സംഭവത്തില് കൂടുതല് അന്വേഷണം നടത്തി വരികയാണെന്നും പൊലീസ് അറിയിച്ചു.