റബത്ത്: മൊറോക്കോയില് വെള്ളിയാഴ്ച രാത്രിയുണ്ടായ ശക്തമായ ഭൂചലനത്തില് 296 മരണം. മൊറോക്കോയിലെ പ്രധാന നഗരമായ മാരാകേഷില് നിന്നും 71 കിലോമീറ്റര് അകലെയാണ് ഭുകമ്പത്തിന്റെ പ്രഭവ കേന്ദ്രം. റിക്ടര് സ്കെയിലില് 6.8 തീവ്രത രേഖപ്പെടുത്തിയ അതിശക്തമായ ഭൂചനമാണ് ഉണ്ടായത്. രാജ്യത്ത് ഇതുവരെയുണ്ടായ ഏറ്റവും ശക്തമായ ഭൂകമ്പമാണ് ഉണ്ടായതെന്ന് മൊറാക്കന് മാധ്യമങ്ങള് റിപ്പോര്ട്ട് ചെയ്തു.
ഭൂകമ്പത്തിന്റെ പ്രഭവകേന്ദ്രത്തിനടുത്തുള്ള അല്-ഹൗസ് പട്ടണത്തില് നിരവധി കെട്ടിടങ്ങള് തകര്ന്നതായി റിപ്പോര്ട്ടുണ്ട്. നിരവധി പേര് അവശിഷ്ടങ്ങള്ക്കിടയില് കുടുങ്ങി കിടക്കുകയാണ്. മരാകേഷിലെ ആശുപത്രികളില് പരിക്കേറ്റവരെ കൊണ്ട് നിറഞ്ഞിരിക്കുകയാണ്. അയല്രാജ്യമായ അല്ജീരിയയിലും ചെറുഭൂചലനം അനുഭവപ്പെട്ടിരുന്നു. ഇവിടെ നാശനഷ്ടങ്ങളോ ആളപായമോ റിപ്പോര്ട്ട് ചെയ്തിട്ടില്ല.
തീരദേശ നഗരങ്ങളായ റബാത്ത്, കാസബ്ലാങ്ക, എസ്സൗറ എന്നിവിടങ്ങളിലും കനത്ത നാശനഷ്ടം ഉണ്ടായി. മേഖലയിലെ വൈദ്യുത-ഇന്റര്നെറ്റ് ബന്ധം തടസ്സപ്പെട്ടു. 2004-ല് വടക്കുകിഴക്കന് മൊറോക്കോയിലെ അല് ഹൊസീമയില് ഉണ്ടായ ഭൂകമ്പത്തില് 628 പേര് കൊല്ലപ്പെടുകയും 926 പേര്ക്ക് പരിക്കേല്ക്കുകയും ചെയ്തിരുന്നു.