ഗുരുവായൂര്‍ : ദുബായില്‍ മരിച്ച ഗൃഹനാഥന്റെ മൃതദേഹം നാട്ടിലെത്തിക്കാന്‍ കനിവ് തേടി ഭാര്യയും മക്കളും. കാരക്കാട് വള്ളിക്കാട്ടുവളപ്പില്‍ സുരേഷ്‌കുമാര്‍ (59) ആണ് ദുബായിലെ സൗദി ജര്‍മന്‍ ഹോസ്പിറ്റലില്‍ മരിച്ചത്. ഏപ്രില്‍ 22നാണ് സുരേഷ്‌കുമാര്‍ മരിച്ചത്. ബില്‍ അടയ്ക്കാന്‍ ബാക്കിയുള്ളതിനാല്‍ ആശുപത്രിയില്‍ നിന്നു മൃതദേഹം വിട്ടുകിട്ടിയിട്ടില്ലെന്നാണ് വിവരം. കഴിഞ്ഞ 12 ദിവസമായി ഭാര്യയും മക്കളും മൃതദേഹത്തിനായി കാത്തിരിക്കുകയാണ്.
ദുബായില്‍ വാഹനം ഓടിച്ചിരുന്ന സുരേഷ്‌കുമാര്‍ ഏപ്രില്‍ 5നാണ് പനിയെ തുടര്‍ന്നു സുഹൃത്തിനൊപ്പം ആശുപത്രിയിലെത്തിയത്. വൈകാതെ ന്യൂമോണിയ സ്ഥിരീകരിച്ചു. സംസാരിക്കാന്‍ കഴിയാതെ 14 ദിവസം വെന്റിലേറ്ററില്‍ കഴിഞ്ഞു. ആശുപത്രിയില്‍ പോകുന്നതിനു മുന്‍പ് സുരേഷ്‌കുമാര്‍ വീട്ടിലേക്ക് വിളിച്ചിരുന്നു. രണ്ടാഴ്ച കഴിഞ്ഞാല്‍ നാട്ടില്‍ എത്തുമെന്ന് മകളോട് പറഞ്ഞിരുന്നത്. സുരേഷ്‌കുമാറിന്റെ ഭാര്യ സുപ്രിയ പല പ്രവാസി സംഘടനകളെയും അറിയിച്ചെങ്കിലും കൃത്യമായ മറുപടി ലഭിച്ചില്ല.മൃതദേഹം നാട്ടിലെത്തിക്കാന്‍ സര്‍ക്കാരുകളുടെയും പ്രവാസി സംഘടനകളുടെയും സഹായം തേടുകയാണ് ഈ കുടുംബം.
