തിരുവനന്തപുരം: കേരളകൗമുദി ചീഫ് എഡിറ്റര്‍ എം.എസ്.രവി അന്തരിച്ചു. 68 വയസായിരുന്നു. വെള്ളിയാഴ്ച
ഉച്ചയോടെ സ്വവസതിയില്‍ കുഴഞ്ഞ് വീണതിനെ തുടര്‍ന്ന് തിരുവനന്തപുരത്തെ സ്വകാര്യ ആശുപത്രിയില്‍ എത്തിച്ചെങ്കിലും മരണം സംഭവിക്കുകയായിരുന്നു.
സംസ്‌കാരം ശനിയാഴ്ച വൈകിട്ട് നാല് മണിക്ക് പേട്ടയിലെ വീട്ടുവളപ്പില്‍ നടക്കും.പേട്ടയിലെ വസതിയില്‍ പൊതു ദര്‍ശനത്തിനു വച്ചിരിക്കുന്ന ഭൗതിക ദേഹത്തില്‍ രാഷ്ട്രീയ, സാമൂഹിക, സാംസ്‌കാരിക, മാദ്ധ്യമ രംഗങ്ങളിലെ പ്രമുഖര്‍ അന്ത്യോപചാരം അര്‍പ്പിച്ചു.
മലയാള പത്രപ്രവര്‍ത്തനത്തിന് പരിവര്‍ത്തനത്തിന്റെ മുനയും മൂര്‍ച്ചയും നല്‍കിയ പത്രാധിപര്‍ കെ. സുകുമാരന്റെ ഇളയ മകനായി 1950 ലായിരുന്നു ജനനം. അച്ചടി മാദ്ധ്യമ രംഗത്ത് ആധുനികതയുടെ ഘട്ടത്തില്‍ കേരളകൗമുദിക്ക് പുതിയ മുഖം നല്‍കുന്നതില്‍ നായകത്വം വഹിച്ചത് എം.എസ്.രവിയാണ്. സാമൂഹിക, സാംസ്‌കാരിക, ജീവകാരുണ്യ പ്രവര്‍ത്തനങ്ങളില്‍ സജീവമായിരുന്നു. മാദ്ധ്യമ – സാംസ്‌കാരിക രംഗത്തെ നിരവധി പുരസ്‌കാരങ്ങള്‍ ലഭിച്ചിട്ടുണ്ട്.
കൊല്ലം പള്ളിത്തോട്ടം വിമലാനിവാസില്‍ ശൈലജയാണ് ഭാര്യ. കേരളകൗമുദി എഡിറ്റര്‍ ദീപുരവി, കേരളകൗമുദി ഡയറക്ടര്‍ (മാര്‍ക്കറ്റിംഗ്) ദര്‍ശന്‍ രവി എന്നിവര്‍ മക്കളാണ്. മരുമകള്‍: ദിവ്യ. ചെറുമകള്‍: ജാന്‍വി.
കേരളകൗമുദി മുന്‍ പത്രാധിപര്‍ എം.എസ്. മണി, പരേതരായ എം.എസ്.മധുസൂദനന്‍, എം.എസ്. ശ്രീനിവാസന്‍ എന്നിവര്‍ സഹോദരങ്ങളാണ്.
എം.എസ്.രവിയുടെ വിയോഗത്തില്‍ രാഷ്ട്രദീപം ഗ്രൂപ്പ് അനുശോചനം രേഖപ്പെടുത്തി.
